"Qarabağ" Çempionlar Liqasının 3-cü təsnifat mərhələsinin ilk oyunu çərçivəsində Bakıda "Ludoqorets"i qəbul edəcək.

“Football-plus.az” xəbər verir ki, Ağdam təmsilçisinin baş məşqçisi Qurban Qurbanov matçdan öncə keçirilən mətbuat konfransında jurnalistlərin suallarını cavablandırıb:

- "Ludoqorets" səfər matçlarında uduzub. Bu, sizin üçün nəsə deyir?

- Xeyr. Mərhələ iki matçdan ibarətdi. "Ludoqorets"in oyununa baxanda, oyunçuların, komandanın təcrübəsi məni cəlb etdi. Çox soyuqqanlıdırlar. Oyunu yaxşı idarə edirlər. Bəzən görürsən ki, hansısa dəqiqələrdə komanda öz oyununu itirir, düşündüklərini meydanda edə bilmir. Amma "Ludoqorets" istənilən anda, lazım olanı edə bilir. Bu da məni çox cəlb etdi. Əvvəlki oyunların nəticəsinə baxmırıq. Bəlkə komandada hardasa bir az qeyri-ciddilik olub. Amma ilk oyunda nəticə əldə ediblər, cavab matçında isə nəticəni qoruyublar.

- Elvin Cəfərquliyev "Araz-Naxçıvan"la matçda da qırmızı vərəqə ilə cəzalandırıldı. Bu dəfə şans versəz, hazırdır?

- Onun qırmızı vərəqəsini çox da müzakirə etməyə ehtiyac yoxdu. Bəli, hər bir futbolçu özünü düzgün idarə etməyə çalışmalıdı. Bu, çox vacibdi. Çünki futbol kollektiv oyundu. Hazırlaşırsan, amma düşünmədiyin anlarda həmin detallar təsir edir. Mənə də Elvin haqda çox suallar verilməsini istəməzdim. Psixoloji basqı ola bilər. Kollektivdə problem yoxdursa, işləməyə nə var ki? Bəzən belə amillərin faydası olur ki, digər oyunçular ayılsın, diqqətli olsun. Çempionatda qırmızı vərəqə alması Elvinin özü və digər oyunçular üçün də siqnal olsun. Elvinin futbol təcrübəsi az deyil. Yaşına baxmayaraq, avrokuboklarda, milli oyunlarda böyük təcrübəyə malikdir. İnanmıram ki, sabah meydana buraxsaq, əsəbləri onun üçün problemə çevrilsin. Özü də başa düşür. Təcrübəsi xeyli çoxalıb. Özü də bilir ki, bu halların təkrarlanması onun üçün də yaxşı deyil. Futbol mübarizə oyunudu. Bəzən görürsən ki, hakimlər ilk sarı vərəqəni verməyə tələsirlər. Dəfələrlə demişəm, oyunlara baxırıq, bəzi qərarlarda hakimlər fərqli yanaşır. Biri sərt oyuna şərait yaradır, digəri yaratmır. Hakimlər deyir biz oyunçuları qoruyuruq. Amma deyirəm ki, komandanı qorumuruq axı. Biri var dirsəklə vurmaq, biri var açıq ayaqla vurmaq. İstənilən halda, hakimlərə haqq qazandırmaya bilmirik. Qalır hakimin idarəçiliyinə ki, versə nə olar, verməsə nə olar? Bu da təcrübədən, çempionatın səviyyəsindən irəli gəlir. Çempionlar Liqasında görürük ki, hakim oyunun əvvəlində sarı vərəqə verə bilər, amma sonda göstərir. Hansısa komandanın gücünü almırlar. Sonda isə problem futbolçuya gəlib çıxır. Oyunçu belə halları nəzarətdə saxlamalıdır ki, qarşıdakı matçlarda hakimlər ona qarşı daim sarı göstərməkdə maraqlı olmasın.

- Püşkatma sizin üçün uğurludur? Pley-off mərhələsində "Qarabağ"ı "Dinamo" (Zaqreb) gözləyir...

- Həmişə istənilən püşkə normal yanaşmışam. Hər bir komanda öz ölkəsinin çempionudu. Onlara qeyri-ciddi yanaşa bilmərik. Eləcə də, bizə qeyri-ciddi yanaşa bilməzlər. Bizi indi düşündürən, vacib olan "Ludoqorets"dir. Ardıcıl 9 il avrokubokların qrup mərhələsində oynamaq çox böyük nailiyyətdi. Çox diqqətli olmalıyıq. Hansısa dəqiqələrdə üstünlüyümüz ola bilər, amma bu, bizi aldatmamalıdı. Fərdi keyfiyyətləri üstün olan komandalar var. Çox ciddi olmalıyıq.

- Mərc şirkətləri sabahkı matçda "Qarabağ"ı favorit göstərir. Bu haqda nə deyərdiz?

- Normal baxıram. İki komandadan birini favorit göstərməlidirlər. Bizə o gözlə baxırlarsa, belə reaksiya verməli deyilik. İşin görünən və görünməyən tərəfi var. Ola bilər ki, görünən tərəfini görürlər. Bizim ən böyük diqqətimiz elə görünməyən tərəflərdə olur. Onu düzgün analiz etməliyik. Normal baxıram. Elə olub ki, rəqibimizi favorit görüblər. Biz buna görə oyuna görə hazırlaşmayacağıq.

- Musa Qurbanlının durumu nə yerdədi?

- Menisk əməliyyatı bir aylıq prosesdi. Sonra bərpa prosesi gedi. Çox da ciddi zədə deyil. Fərdi məşqlərə başlayıb. Üç gündür artıq məşq edir. Bir həftəyə komanda ilə məşqlərə başlayacaq. Bir aydan sonra lazım olan halda meydana çıxa bilər.

- Ötən mövsüm avrokuboklarda sıçrayış etdiniz. Qorxmursuz ki, Juninyonu qışda itirə bilərsiz? Çünki çox yaxşı çıxış edir..

- Bizə böyük diqqət ayırırlar, doğrudu. Bunun hər oyunda şahidi olmuşuq. "Ludoqrets" haqda danışıramsa ki, təcrübəli klubdu, onlar da bizim haqqımızda belə danışırlar. Bu, işimizi çətinləşdirir. Ancaq əlavə motivasiya verir. Daha hazırlıqlı olmalıyıq ki, rəqibin bizə qarşı göstərdiyi mübarizəyə də hazır olaq. Juninyo məsələsinə gəldikdə, bu barədə düşünmürük. Məqsədimiz onu daha da yaxşı etməkdi. Komandaya faydası daha çox olmalıdı. O, özü peşəkar olaraq, yaxşı anlamalıdı. Bilməlidi ki, rəqiblər hər qol vurduqca onun oyununu izləyirlər. Juninyonun hazırlığı öndə olmalıdı ki, rəqibdən üstün olsun. Qışa kimi nə olacaq, onu zaman göstərəcək.

- "Qarabağ"a yeni oyunçu gələcək?

- Gəlməli idi. Amma gələsi olmadı. O qədər dedim ki, danışırıq, sonda alınmır, bu dəfə də elə oldu. İki gün öncə bir futbolçu Bakıda olmalı idi. Amma əfsuslar sonda ortaya nəsə çıxdı və alınmadı. Hələ ki, qalıb.