“Sabah”ın futbolçusu Elvin Camalov “Football-plus.az”a müsahibə verib.

- Elvin, belə amansız mübarizədən sonra təəssüratın necədi?
- Əlbəttə, çox sevincliyik. Bütün komanda və azarkeşlər olaraq, buna hazırlaşmışdıq. Səfərdəki oyundan fərqli çox çətin oyun keçdi. Demək olar, daha fərqli rəqib gördük. Buna baxmayaraq, əziyyətimiz yerdə qalmadı. Sonda qələbə çalan biz olduq. Bunun üçün bizi dəstəkləyən, yanımızda olan və bizə inanan hər kəsə təşəkkürümü bildirirəm.

- Həm 90 dəqiqədə, həm də əlavə vaxta müdafiədə çox səhvləriniz oldu…
- Düzdü. Biz də istəməzdik. Elə epizodlar olurdu ki, çox çarəsiz qalırdıq.

- Rəqibin gücü idi, yoxsa “Sabah”ın zəifliyi?
- Əvvəldən yaxşı başlamadıq. Səfərdə də ilk 20 dəqiqə yaxşı keçməmişdi, amma sonra toparlanmışdıq. Burda isə toparlana bilmədik. Həm də rəqib daha ciddi hazırlaşmışdı, bu da gözlənilən idi. Amma  sona qədər savaşdıq. Əlimizə düşən fürsətlərdən yaxşı istifadə elədik. Sonda da penaltilər oyunun taleyini həll elədi. Düşünürəm ki, ordakı əziyyətimizlə burdakı mübarizəmizin cəmi bəhrə verdi.

- Oyuna sonradan qoşuldun. Bu, baş məşqçinin qərarı idi, yoxsa fiziki durumunda problem var?
- İki gün öncə məşqdə ağrılarım vardı. Baş məşqçi ilə söhbətimiz oldu. Dedi ki, istəyirsənsə ehtiyyatda başla, sonradan meydana çıxarsan. Belə qərar verildi.

- Ağlına gələrdimi ki, 6 top vurub, mərhələ keçərsiz?
- Ağlıma gəlməzdi ki, səfərdə 3 top vurarıq… Burdakı nəticə ilə tarazlıq yarandı. Orda da, burda da 3 qol vura bildik.

- İlk dəfə Azərbaycan klubu penalti seriyasında qalib gəlirdi. Həmin məqamda “Partizan”la oyun gözünüzün önündən keçdimi?
- O oyundan dərs çıxarmışdıq. Çünki orda qələbəni öz əlimizlə rəqibə verdik. Burda isə ciddi yanaşmışdıq. Bu dəfə uğurlu olduq, qürurluyq. Tarix yazdıq, həm də belə rəqibə qarşı.

- 3-cü təsnifat mərhələsində rəqib “Sent-Patriks” olacaq. Bu dəfə mərhələ adlamaq şansının daha real görünür...
- Fikrimcə, rahat rəqib yoxdu. Hər şey meydanda həll olunur. İndi biz özümüzü fovorit sayıb, gələn oyunda qələbə qazana bilməsək, onda da adımıza mənfi düşüncələr formalaşacaq. Oyunu oynamamış, öncədən proqnoz vermək düzgün deyil.

RÖYANƏ OĞUZ