İyulun 25-də “Sabah” “Makkabi” üzərində parlaq qələbə qazandı.

Dünən ölkəyə qayıdan “bayquşlar” artıq cavab görüşünə hazırlaşır. Komandanın kapitanı Elvin Camalov “Football-plus.az”a danışıb.

- “Makkabi” ilə oyun necə keçdi, qələbəni necə şərh edərdin?

- Çətin oyun oldu. Güclü rəqiblə qarşılaşacağımızı bilirdik. Yaxşı hazırlıq keçdik. Məşqlərdə də hamı əlindən gələnin ən yaxşısını ortaya qoymağa çalışdı. Şükür ki, meydanda bunun bəhrəsini gördük. İlk hissə bərabər səviyyədə keçsə də, ikincidə biz daha fəal idik. Fikrimcə, layiq olduğumuz qələbəni qazandıq.

- Oyundan əvvəl əksəriyyət “Makkabi”ni favorit görürdü.

- Bu normal haldı... Rəqib bizdən daha təcrübəli idi. Futbolda daha yüksək reytinqli komandanın şanslı hesab edilməsində qəribə heç nə yoxdu.

- Ümumiyyətlə, oyundan əvvəl təhlil etdiyiniz rəqiblə meydanda gördüyünüz “Makkabi” arasında hansı fərqlər var idi?

- Gözlədiyimiz kimi, rəqib güclü idi. Sadəcə, bu oyuna çox yaxşı hazirlaşmışdıq, rəqibi yaxşı təhlil etmişdik. Bu oyundan sonra da “Makkabi”yə münasibətimiz dəyişmədi.

- Stadionda az da olsa, azarkeşiniz var idi.

- Kişvardada hemvətənlərimizin dəstəyi bizə çox xoş oldu. Onların stadionda olmasi bizə əlavə güc verdi. Fürsətdən istifadə edib komandamızı uzaq səfər oyununda tək qoymayan hər bir həmvətənlimizə təşəkkür edirəm.

- Oyununuzu görənlər sizi çempionluq uğrunda mübarizədə “Qarabağ”ın əsas rəqibi sayır.

- İndi bizi yalnız qarşıdakı “Makkabi” ilə cavab oyunu düşündürür. Yalnız bu matça köklənmişik. Əlbəttə, çempionatda da azarkeşlerimizi sevindirmək üçün əlimizdən gələni edəcəyik.

- Ev oyununa necə hazırlaşacaqsız? Səncə, növbəti oyun daha çətin olacaq?

- Bəli, məncə, ikinci oyun daha çətin olacaq. Rəqib cavab matçına tam fərqli hazirlaşacaq. İlk oyundakı nəticədən arxayınlaşmaq olmaz. Oyun planımıza sadiq qalmalı və evdəki oyunda son nöqtəni qoyub, növbəti mərhələyə vəsiqə qazanmalıyıq. Yaxşı futbolçulardan ibarət mehriban kollektivimiz var.

- Burdan azarkeşlərə, sizi sevənlərə nə demək istərdin?

- Cavab oyununda da bizə dəstək olsunlar. Doğma “Bank Respublika Arena”da əsl avrokubok atmosferinin yaranacağına inanıram. Azarkeşlərimizin dəstəyi bizim üçün böyük motivasiyadı.

RÖYANƏ OĞUZ