Azərbaycan yığması Albaniya və Qazaxıstan ilə yoldaşlıq oyunlarının ardından vətənə döndü.

Arif Əsədovun rəhbərliyi altında sonuncu dəfə oynayan millinin artıq Fernando Santuşa tapşırıldığı da bəllidi. Həm Macarıstan səfəri, həm də son hadisələrlə bağlı yığma üzvü Elvin Camalovun fikirlərini öyrəndik.

- Son oyununuz Qazaxıstan millisinə qarşı oldu. Görüş necə keçdi, həm rəqibin, həm də öz komandanın oyunu haqda nə deyərdin?
- Düzdü, qapımızda erkən qol gördük. Əzmkarlıq göstərərək geridönüş etməyi bacardıq. Bütün komanda olaraq, hər oyunçu əlindən gələni etdi. Düşünürəm ki, geridönüşlə qazanılan qələbə ikiqat qiymətlidi. Buna görə də bizə dəstək olan hər kəsi, qələbəmizdə rol oynayan bütün məşqçilər heyətini, futbolçuları təbrik edirəm.

- Bəli, geridönüş edərək qələbə qazanmağı bacardız.
Oyundan əvvəl belə çətin qarşılaşma olacağını gözləyirdin? Nəzərə alsaq ki, baş məşqçi dəyişikliyi edən bir komandaya qarşı oynayırdız. Rəqib də son illər inkişafdadı.
- Geridönüşlə qazandığımız qələbə hər birimizin sayəsində oldu. Sona qədər əzmkarlıq göstərdik və əziyyətimizin qarşılığını gördük. Əlbəttə, Qazaxıstan millisi güclü rəqiblərdən biridi. Zəif rəqib yoxdu. Ancaq biz ilk növbədə özümüzə, komanda yoldaşlarımıza, məşqçilərimizə inanandan sonra hər şey öz əlimizdədi. İnam olandan, əzmkarlıq göstərdikdən sonra istənilən rəqibə qalib gəlmək olur.

- Bəs Albaniya ilə oyunda  komandanı qələbədən uzaqlaşdıran nə oldu? Rəqib amili, istədiyiniz oyunu ortaya qoya bilməmək, yoxsa...
- Albaniya ilə oyunda da topa daha çox nəzarət edən tərəf biz idik. Çox qol imkanımız oldu. Sadəcə, fərdi səhvlərin hesabına məğlub olduq. Amma həmin oyunda da komanda yaxşı çıxış etdi. Fərdi səhvlərin ucbatından qələbə qazana bilmədik. İstəyirdik ki, hər iki matçda qalib gələrək vətənə dönək. Və bizi izləyən hər kəsi sevindirək. Amma qismət belə oldu.

- Sanki hər iki oyunda meydanda tam başqa milli gördük. Təbii ki, əsasən nəticəyə görə belə düşünmək, fərqli yanaşmaq olar. Sən necə düşünürsən, performansınızı necə qiymətləndirərdin?
- Düzdü, hər iki oyunda fərqli nəticə oldu. Sadəcə, birinci oyuna yaxşı başlamadıq. Sonradan nəyisə duzəltməyə çalışdıq və fərdi səhvlərə görə buraxdığımız qolların əziyyətini çəkdik. İkinci oyunda isə meydandan yaxşı nəticə ilə ayrılmağı bacardıq. Bu futboldu, bəzən belə ola bilir.

- Oyunçuların tam formada olmadığı ilə bağlı fikirlər var idi. Bu kimi amillər sən daxil digər oyunçulara da nə dərəcədə çətinlik yaratdı?
- Futbolçuların tam formada olmadığını demək mübahisəli olar. Çünki çempionat yeni bitib, hamı formadadı. Sadəcə, psixoloji təsir ola bilər. Əlbəttə, hər oyunçunun, elə mənim də borcumuzdu ki, nə vaxt dəvət etsələr, millimizi layiqincə təmsil edək. Sadəcə, mövsümun sonu idi. Ola bilər ki, yorğunluq amili vardı. Amma çox şükür, ikinci oyunda qələbə qazanaraq əziyyətimizin bəhrəsini gördük.

- Doğrudanmı, indi yığma tarixinin ən güclü heyətinə malikdi?
- Fikirlər müxtəlifdi. Hər kəs fərqli düşünə bilər. Şəxsi fikrim belədi ki, milli komanda futbolçu üçün ən üst səviyyədi. Ora dəvət alan oyunçu öz adını və Azərbaycan milli komandasını təmsil edir. Nəsilləri müqayisə etmək istəməzdim. Çünki ildən-ilə müəyyən fərq ola bilər. Ancaq millidəyiksə, hər birimiz ən yaxşısını edərək bu komanda üçün vuruşmalıyıq. Azərbaycan adını daha da yuxarılara qaldırmaq üçün əlimizdən gələni etməliyik.

- Arif Əsədovun rəhbərliyi altında son oyuna çıxdız. Onun məşqçi keyfiyyətləri barədə nə düşünürsən?
- Mən əvvəllər də Arif müəllim rəhbərliyi altında U-17, U-19 yığmalarında oynamışam. Nə istədiyini çox yaxşı bilirəm. Əsas millidə də Arif müəllim təcrübəsini bizimlə paylaşırdı. Biz isə çalışırdıq ki, onun göstərişlərini tam şəkildə yerinə yetirək. Həmçinin də məşqdən kənarda nizam-intizama əməl etməyə çalışırdıq.

- Yığmanı bundan sonra Fernando Santuş çalışdıracaq. Yeni baş məşqçi ilə bağlı gözləntilərin?
- Bu suala cavab verməyim bəlkə də düzgün olmaz. Çünki biz futbolçuyuq, işimiz tapşırıqları yerinə yetirməkdi. Bundan sonra yeni baş məşqçinin nəzarəti altında oynayacağıq. Əlbəttə, hamıya tanış olan simadı. Əsas odu ki, millimiz üçün yeni uğurlar, daha yaxşı nailiyyətlər qazanmaq baxımından hər birimiz üçün xeyirlisi olsun. Buna inanıram.

- Albaniya və Qazaxıstan ilə oyunlarda hansı təcrübəni qazandın? Bu görüşlərin Millətlər Liqasında əhəmiyyəti olacaqmı?
- Təbii ki, Albaniya və Qazaxıstan milliləri kimi güclü komandalara qarşı oynamaq bizim üçün çox yaxşı təcrübə oldu. Düşünürəm ki, bu təcrübəni dəyərləndirib, səhvlərimizdən nəticə çıxararıq. Millətlər Liqasında daha yaxşı milli görəcəksiz.

RÖYANƏ OĞUZ