İyulun son iki günündə Çempionlar Liqasının (ÇL) 2-ci təsnifat mərhələsinin cavab oyunları keçirildi.

Rəqiblərinə üstün gələn 14 komanda növbəti mərhələyə vəsiqə qazandı. Gözlənildiyi kimi, mərhələni keçən komandalar arasında “Qarabağ” da var. Qeyd edək ki, son çempionumuz reytinqinə əsasən mübarizəyə məhz 2-ci təsnifat mərhələsindən başladı. “Linkoln Red İmps”i Bakıda 5 cavabsız qolla üstələyən ağdamlıların növbəti mərhələdəki potensial rəqiblərinin cavab oyunu neytral meydanda baş tutdu. Xatırladaq ki, Bolqarıstanda keçirilən ilk oyun yerli “Ludoqorets”in “Dinamo-Minsk” üzərində 2:0 hesablı qələbəsi ilə nəticələnmişdi. Ev oyunlarını UEFA-nın məlum sanksiyasına görə neytral meydanlarda keçirən “Dinamo-Minsk”in həm də bu səbəbdən iki topluq fərqi aradan qaldırmaq ehtimalı real görünmürdü. Baş məşqçi Vadim Skripçenko komandasının hər halda çətin missiyanı yerinə yetirmək üçün əlindən gələni edəcəyini bildirmişdi. Minsklilər Macarıstanın Mezoköveşd şəhərində keçirilən cavab oyununda rəqibinə ciddi mübarizə təklif edə bildi.

Doğrudu, ilk dəqiqələr bolqarların təhlükəli hücumları ilə yadda qaldı. Qapıçı Lapouxov Ruan Krusun zərbəsini dəf etdi, Rik isə gözəl şansı boşa verdi. Belarus çempionunun bu həmlələrə cavabı daha ciddi oldu: Baxarın zərbəsindən sonra top tirə tuş gəldi. Bundan sonra da maraqlı oyun sərgiləyən qonaqlar oldu. Lakin “Dinamo-Minsk”in 37-ci dəqiqəyə təsadüf edən hücumunda həmin Baxar Sedko və Melniçenkonun iştirakıyla qurulan gözəl kombinasiyanı dəqiq tamamladı. Fasilə ərəfəsində Demçenko iki oyunun ümumi nəticəsinə əsasən hesabı bərabərləşdirmək şansını boşa verdi. Bolqarlar ikinci hissəyə də fəal başladılar. Lapouxov Rik ilə Tekpeteyin zərbəsini dəf etməklə komandasını ikinci qolu vurmaq üçün ruhlandırdı. Lakin minsklilərin bir neçə yaddaqalan hücumu rəqibin müdafiə xəttinin inamlı oyunu sayəsində nəticəsiz qaldı.

Beləliklə, bu cütün favoriti çətinliklə də olsa statusunu doğrultdu. Əvvəlki mərhələdə postsovet məkanından olan “Dinamo Batumi”ni (3:1, 0:1) mübarizədən kənarlaşdıran “Ludoqorets”in növbəti mərhələdə “Qarabağ”la qarşılaşacağı rəsmiləşdi. Razqrad klubu ilə ilk oyun avqustun 6-da Bakıda keçiriləcək.

2-ci təsnifat mərhələsi, cavab oyunları
Dinamo-Minsk (Belarus) - Ludoqorets (Bolqarıstan) 1:0 (ilk oyun – 0:2)
Baxar, 37.

Ludoqorets: Bonmann, Nedyalkov, Almeyda, Verdon, Vitryu, Petrovski, Nedelev (Naressi, 46), Çoçev, Tekpetey (Vidal, 71), Ruan Krus (Dua, 46), Rik (Delev, 90+2).

Partizan (Serbiya) - Dinamo (Ukrayna) 0:3 (2:6)
Yarmolenko, 17. Vanat, 69-p. Karavayev, 90+3.
Dinamo: Buşan, Dubinçak, Popov, Dyaçuk (Bilovar, 54), Buyalski (Andriyevski, 70), Pixalenok, Karavayev, Şaparenko (Lonviyk, 70), Yarmolenko, Voloşin, Vanat (Supryaqa, 79).

QARABAĞ (AZƏRBAYCAN) - Linkoln Red İmps (Cəbəllütariq) 5:0 (2:0)
Juninyo, 17; 31; 44. Benzya, 66. Leandro Andrade, 72.

Petrokub (Moldova) - APOEL (Cənubi Kipr) 1:1 (0:1)
Pletike, 60 – Markinyos, 66.

Sparta (Çexiya) - Şemrok Rovers (İrlandiya) 4:2 (2:0)
Olatunji, 29. Ross, 41. Serensen, 48. Tuki, 71 – Qrin, 32; 47.

Fənərbaxça (Türkiyə) - Luqano (İsveçrə) 2:1 (4:3)
Ceko, 59. Şimanski, 90+3 – Belhac, 7.
Nyu Seynts (Uels) - Ferentsvaroş (Macarıstan) 1:2 (0:5)
Danielsya, 90+1 - Zaxariassen, 43. Rommens, 62.
Slovan (Slovakiya) - Selye (Sloveniya) 5:0 (1:1)
Toliç, 17. Strelets, 30; 72. Mak, 60. Barseqyan, 75.
Klaksvik (Farer adaları) - Malmö (İsveç) 3:2 (1:4)
Bertnsson, 2. Frederiksberq, 65; 90+5 - Bolin, 13. Kristiansen, 59-p.
Makkabi (Təl-Əviv, İsrail) - FKSB (Rumıniya) 0:1 (1:1)
Baeten, 90.
Yagelloniya (Polşa) - Panevejis (Litva) 3:1 (4:0)
Pululu, 1-p.; 69-p. Beneta, 84-öz qapısına - Qussias, 88.
Borats (Bosniya və Hersoqovina) - PAOK (Yunanıstan) 0:1 (2:3)
Murq, 25.
RFŞ (Latviya) - Bude/Qlimt (Norveç) 1:3 (0:4)
İkaunieks, 14 – Hauqe, 40-p. Saltnes, 82. Hoq, 88.
Midtüllann (Danimarka) - UE Santa Koloma (Andorra) 1:0 (3:0)
Osorio, 72.

İlk oyunları avqustun 6-7-də keçiriləcək 3-cü təsnifat mərhələsində cütlər belə formalaşıb: QARABAĞ – Ludoqorets, Slovan – APOEL, Sparta – FKSB, Malmö – PAOK, Midtüllann – Ferentsvaroş, Yagelloniya - Bude/Qlimt.