İyulun 23-24-də Çempionlar Liqasının (ÇL) 2-ci təsnifat mərhələsinin ilk oyunları keçirildi. 14 oyundan yalnız ikisində qalib müəyyənləşmədi, ev sahibləri 7, qonaqlar isə 5 qələbə qazandılar.

Sevindiricidi ki, rəqib meydanında qalib gəlməklə mərhələni keçmək şansını artıran komandalar arasında “Qarabağ” da var. Qeyd edək ki, son çempion ölkəmizin reytinqinə əsasən mübarizəyə məhz 2-ci təsnifat mərhələsindən başladı. “Linkoln Red İmps”i Cəbəllütariqdə iki cavasız qolla üstələyən ağdamlıların növbəti mərhələdəki potensial rəqiblərinin ilk oyunu Bolqarıstanda baş tutdu.

Əvvəlki mərhələdə postsovet məkanından olan “Dinamo Batumi”ni (3:1, 0:1) mübarizədən kənarlaşdıran yerli “Ludoqorets” və “Dinamo-Minsk” arasındakı matçın nəticəsini ilk hissədə vurulan qollar müəyyən etdi. Razqradda 5323 tamaşaçının izlədiyi oyunun əvvəlində müdafiəçi Qavriloviç hesabı açmaq üçün gözəl şansı boşa verdi. Ev sahibləri çox keçmədən belarusları buna görə sərt cəzalandırdılar: qanalı hücumçu Tekpetey özünün başladığı hücumun son mərhələsində yarımmüdafiəçi Petrovskinin ötürməsini qola çevirdi. Bununla kifayətlənməyən “Ludoqorets” hücumlarını davam etdirdi. Minskililərin qapıçısı Lapouxov Vitryunun hiyləgərcəsinə endirdiyi zərbənin qarşısını aldı, Qavriloviç isə Nedelevin sevinməsinə imkan vermədi.

Belarusun son çempionu ilk hissədə yalnız ev sahiblərinin hücumlarının qarşısını almağa çalışmadı. Piqas ilə Milniçenkonun hesaba tarazlıq gətirmək üçün yaxşı imkanları oldu. Lakin şanslar boşa verildi və bolqarlar yenə rəqibi sərt cəzalandırdılar: Nedelev özünün qazandığı penalti ilə hesabı 2:0-a çatdırdı. Fasilədən sonra ev sahibləri əsasən sərfəli hesabı qorumaq üçün oynadılar. Georgi Dermenciyevin komandası Padtın qoruduğu qapı qarşısında ciddi təhlükə yaranmasına, demək olar ki, imkan vermədi. İkinci hisədə meydana çıxan Alfred, Adeola və Xvaşinskinin, həmçinin Demçenkonun cəhdləri nəticəsiz qaldı.

Beləliklə, Bolqarıstan çempionu inamlı qələbə ilə ÇL-in 3-cü təsnifat mərhələsində oynamaq şansını artırdı. Ev oyunlarını UEFA-nın məlum sanksiyasına görə neytral meydanlarda keçirən “Dinamo-Minsk”in həm də bu səbəbdən iki topluq fərqi aradan qaldırmaq ehtimalı real görünmür.

2-ci təsnifat mərhələsi, ilk oyunlar

Ludoqorets (Bolqarıstan) - Dinamo-Minsk (Belarus) 2:0
Tekpetey, 9. Nedelev, 45+1-p.
Ludoqorets: Padt, Nedyalkov, Almeyda, Verdon, Vitryu, Petrovski, Nedelev (Duarte, 78), Çoçev, Rik (Kayo Vidal, 73), Ruan Krus (Tissera, 62), Tekpetey (Delev, 78).
Dinamo-Minsk: Lapouxov, Piqas, Politeviç, Qavriloviç, Ray, Şkolik (Alfred, 53), Selyava (Bıkov, 87), Demçenko, Podstrelov (İqor, 53), Milniçenko (Xvaşinski, 87), Jerdev (Adeola, 56).
Dinamo (Ukrayna) – Partizan (Serbiya) 6:2
Şaparenko, 40. Brajko, 43. Karavayev, 45+1. Kabayev, 55. Popov, 83. Pixalenok, 90+2 – Saldanya, 22; 66.
Dinamo: Buşan, Vivçarenko, Popov, Dyaçuk, Buyalski (Pixalenok, 46), Karavayev (Malış, 46), Şaparenko (Lonviyk, 86), Brajko (Andriyevski, 86), Kabayev, Yarmolenko (Voloşin, 69), Vanat.
Linkoln Red İmps (Cəbəllütariq) - QARABAĞ (AZƏRBAYCAN) 0:2
Juninyo, 45+2. Bayramov, 72.
UE Santa Koloma (Andorra) - Midtüllann (Danimarka) 0:3
Frankulino, 12. Diao, 28. Simsir, 63.
Ferentsvaroş (Macarıstan) – Nyu Seynts (Uels) 5:0
Traore, 15; 21; 54. Zaxariassen, 24. Markinyos, 62-p.
Bude/Qlimt (Norveç) – RFŞ (Latviya) 4:0
Mikkelsen, 2; 76. Saltnes, 18. Kapskarmo, 40.
Panevejis (Litva) - Yagelloniya Belostok (Polşa) 0:4
İmas, 15; 28; 29. Hansen, 80.
Malmö (İsveç) - Klaksvik (Farer adaları) 4:1
Yonsen, 21; 43. Bolin, 37. Rieks, 85 – Frederiksberq, 71.
APOEL (Cənubi Kipr) - Petrokub (Moldova) 1:0
Markinyos, 38-p.
FKSB (Rumıniya) - Makkabi (Təl-Əviv, İsrail) 1:1
Dava, 76 – Biton, 71.
Luqano (İsveçrə) – Fənərbaxça (Türkiyə) 3:4
Əl-Vafi, 4. Bislimi, 64. Valensuela, 90+4 – Ceko, 45+1-p.; 46; 67. Kadıoğlu, 74.
Şemrok Rovers (İrlandiya) - Sparta (Çexiya) 0:2
Birmançeviç, 38. Vizner, 65.
PAOK (Yunanıstan) - Borats (Bosniya və Hersoqovina) 3:2
Kulierakis, 17; 39. Trost-Ekonq, 51 – Errera, 22-p. Kulaşin, 45+3.
Selye (Sloveniya) - Slovan (Slovakiya) 1:1
Bobiçanets, 7 – Strelets, 11.

Cavab oyunları iyulun 30-31-də keçiriləcək.