Malta təmsilçisi “Hamrun Spartans”la mübarizədə qalib ayrılan “Linkoln Red İmps”ın yenidən “Qarabağ”la qarşılaşacağınından xəbərdarsız.

Cəbəllüttariq təmsilçisi heç də bizə yad komanda deyil. Çünki cəmi bir il öncə Çempionlar Liqasının 1-ci təsnifat mərhələsində Ağdam təmsilçisi həm səfər, həm də ev oyununda qalib gələrək (2:1, 4:0), növbəti mərhələyə vəsiqə qazanmışdı. Bəs qisas almaq istəyən “Linkoln”un heyətində o vaxtdan bu yana hansı dəyişikliklər oldu? İlk növbədə komandanın keçmişinə nəzər salaq.

Komanda 1976-cı ildə Cəbəllüttariqin dağılmaqda olan “Qlasis Yunayted” klubunun sərbəst buraxılmış oyunçularıyla tamamlanan “Blue Batons” (yəni mavi dəyənəklər – red.) adıyla yaranıb. Klubun adını dəyişdirməsi isə “Lincoln İmp” əfsanəsiylə bağlıdı (“Lincoln İmp”, Linkoln Katedral kilsəsinin divarında görünən bir heykəldi və bu heykəl daha sonralar şəhərin rəmzi anlamına gəlib – red.). Komanda 2003 və 2016-ci illər aralığında ard-arda 14 dəfə ölkə çempionu adına yiyələnib. Ümumilikdə isə 27 dəfə bu kuboka sahib olmaqla Cəbəllüttariq premyer-liqasında rekorda imza atıb.

2014-cü ildə Çempionlar Liqasına ilk dəfə vəsiqə qazanan “qırmızı cinlər” 1-ci təsnifat mərhələsində Farer adalarının təmsilçisi “Havner Boltfelaq”a məğlub olaraq mübarizəni dayandırmışdı. 2021-ci ildə isə Konfrans Liqasının pley-off mərhələsində Latviya çempionu “Riqa”nı məğlub edərək, Avropada qrup mərhələsinə vəsiqə qazanan ilk Cəbəllüttariq komandası oldu. Komanda ev oyunlarını 2 min yerlik “Viktoriya” stadionunda keçirir. Cəbəllüttariq futbolunun səviyyəsinə görə böyük uğurlar əldə edən komanda “Qarabağ”la dueldə autsayder sayılsa da, qisas almaq və ölkəsi adına yeni tarix yazmaq üçün “dişini göstərəcək”.

Ötən il “Qarabağ”la qarşılaşan heyətlə indikini müqayisə etdikdə azacıq dəyişiklik olub. Bizə tanış olan oyunçuların əksəri komandadadı: İbrahim Ayyu, Con Sarcent, Bernardo Lopeş (k), Nano, Mustafa Yahaya, İtan Britto, İvan Villanueva, Nauzet Santana, Roy Çipolina, Kayl Klinton, Conatan Şortino, Li Kasyaro.

Göründüyü kimi, əsas oyunçular yerindədi. Üstəlik komanda hələ də Xavi Munyosun rəhbərliyi altında çıxış edir.

KAMAL SƏFƏR