Yenicə yığılan və maliyyə problemi yaşayan rəqiblə oyunun artıq 5-ci dəqiqəsində 2:0 önə çıxasan, sonra da ayrı-ayrı oyunçuların səhlənkərlığı və məsuliyyətsizliyi, eləcə də baş məşqçinin yanlış qərarları üzündən önəmli üstünlüyü əldən verib Konfrans Liqasına yollanasan…

Bunu yalnız “Zirə” bacarardı. Avropa Liqasında növbəti mərhələyə adlamaq “qartallar”ı KL-in qrupuna çox yaxınlaşdıracaqdısa, indi yenə dərdlərimizlə baş-başayıq.

Oyun başlar-başlamaz Hacıağanın ötürmədə səhvə yol verməsi ürəkləri titrətdi. Xoşbəxtlikdən Tyaqo vaxtında irəli atılıb topa yiyələndi. Bir qədər sonra Kyabunun Eldara qarşı qaydanı pozması Sariyevin gözündən qaçmadı. Cərimə zərbəsini vurmaq Qismətə həvalə olundu. Volkov kapitanın qapı önünə ötürməsindən sonra topun istiqamətini dəyişərək arxaya çatdırdı ki, Utziq də asanlıqla hesabı açdı.

"Qartallar"ın növbəti standart vəziyyəti də təhlükəli oldu. Lakin Renato Qismətin qapı önünə göndərdiyi topa uğursuz zərbə vurdu. "Arılar"ın ilk təhlükəli hücumu 18-ci dəqiqəyə təsadüd etdi. Qonaqlar Hacıağanın daha bir qeyri-dəqiq ötürməsi üzündən topu ələ keçirdi. Lakin moldovalılar bu dəfə də məqsədə çata bilmədi. Ona görə ki, Tyaqo Ademonun zərbəsini dəf etdi. Meydan sahiblərinin rəqibin şıltaqlığına cavabı gecikmədi. Dərhal Eldarın simasında başlayan əks-hücumu Suma zərbəylə tamamlasa da, Mossa topu uzaqlaşdırdı.

Ümumiyyətlə, "Şerif" tələsirdisə, "Zirə" təmkinli davranırdı.
Hər şey meydan sahiblərinin xeyrinə olarkən 38-ci dəqiqədən sonra hadisələrin axarı dəyişdi. Belə ki, Utziq Linsin kobudluğundan sonra Sumanın yerdə qaldığını görüb topu meydandan çıxardı. Matç bərpa ediləndən sonra "Şerif" topu "Zirə"yə qaytarsa da, "qartallar" yenidən rəqibə çatması üçün meydandan çıxardılar. Epizodun ardınca meydan sahiblərinin xeyrinə qayda pozuntusu qeydə alındı. Lakin bir neçə saniyə sonra Sumanın heç bir əsas olmadan Yadenin üzünə vurması "qırmızı" almasıyla nəticələndi!

Beləliklə, “Zirə” 40-cı dəqiqədən etibarən azlıqda qaldı. Artıq aydın idi ki, “qartallar”ı çətin 2-ci hissə və bəlkə də əlavə vaxt gözləyir.

Bəs Rəşad Sadıqov nə etdi? İlk yarıda yetərincə fəal olan Utziqi meydandan alıb Akanı oyuna qoşdu və mərkəz müdafiəçilərinin sayını artırdı. Belədə rəqibin əli-qolu açıldı, hücumlarının sayı və kəsəri artdı. 54-cü dəqiqədə cinah asmasından sonra Allaşın hesabı bərabərləşdirməsi “Zirə” üçün həyəcan siqnalı olmalıydı. Amma olmadı, “qartallar” bir qədər də artıq qüvvə ilə müdafiənin qayğısına qaldı. “Dişi qana batan” qonaqlar isə hücum cəhdlərini daha da intensivləşdirdi.

65-ci dəqiqədə Zeblinin cərimə meydançası yaxınlığında Miyanı yıxması hakimin gözündən yayınmadı. Burda Badolo "Zirə"ni cəzalandırmaq məqsədilə birbaşa qapını nişan alsa da, qeyri-dəqiq oldu. Meydan sahibləri arabir əks-hücuma çıxmağa çalışsalar da, irəlidə çoxluq yarada bilmirdilər. Rəşad Sadıqovun İsmayılla Fuadı oyuna qoşması, 73-cü dəqiqədə artıq yorulan Volkovu Əhmədzadə ilə əvəzləməsi də heç bir effekt vermədi. 77-ci dəqiqədə “qartallar”ın qorxduğu başına gəldi.

“Şerif”in ümumi hesabı bərabərləşdirməsinin üç günahkarı var. Əvvəlcə Qismət rəqibin zərbəsindən sonra meydandan çıxmaqda olan topa müdaxilə edib kornerə səbəbkar oldu. Ardından Allaş uzaq dirək önünə asma etdi, özünü Azərbaycan çempionatının bir nömrəli qapıçısı sayan Tyaqo çıxışda səhvə yol verdi, Hacıağa mövqeyini itirdi və Yade rahatca qapıya yol tapdı.

Düzdü, Qismət 82-ci dəqiqədə günahını yuya bilərdi. Sadəcə, onun cərimə zərbəsindən birbaşa qapıya göndərdiyi top tirdən qayıtdı. Qalan dəqiqələr "arılar"ın ardıcıl hücumları, "qartallar"ın möhkəm müdafiəsiylə müşayiət olunduğundan əlavə vaxta ehtiyac duyuldu. Artıq havanın da təsiri ilə komandalar çox yorğun görünürdü. "Şerif"in tutarlı hücumları yoxa bərabər idisə, "Zirə" müdafiəsi ayıq-sayıqlığı qorudu. Həmçinin qayda pozuntularının bir-birini izləməsi tempi xeyli aşağı saldı.

Əlavə vaxtın 2-ci hissəsində qonaqlar fəallığıyla seçildi. Moldovalılar gah sağ, gah da sol cinahdan irəli atılır, bəxtini sınamağa tələsirdi. Amma 120 dəqiqə qalibin müəyyənləşməsi üçün yetərli olmadı. Nəticədə penalti seriyasına start verildi. "Zirə"dən Qismət, Renato, Ceyhun və İsmayıl dəqiq olsa da, Fuad qapı tirini "nişan aldı", qonaqlardan isə heç kim büdrəmədi. Daha doğrusu, Tyaqo yenə də heç nə bacarmadı.

Beləliklə, "qartallar" mübarizəni Konfrans Liqasının 2-ci mərhələsində davam etdirəcək. Rəqib Slovakiyanın "DAK 1904" klubudu.

KƏNAN BAHADIR