“Sumqayıt”ın Konfrans Liqasının 2-ci təsnifat mərhələsindəki rəqibi “Fehervar” Sloveniyadan Macarıstana qayıdıb.

Xatırladaq ki, komanda təlim-məşq toplanışı çərçivəsində keçirilən yoxlama oyunlarında “Babolna”nı 9:0 “Ayka”nı 3:2, Bolqarıstan “Hebar”ını 5:2, Sloveniya “Dekani”sini 1:0 məğlub edibsə, Türkiyə “Göztəpə”sinin öhdəsindən gələ bilməyib – 2:2.

“Football-plus.az”ın məlumatına görə, “Fehervar”ın baş məşqçisi Tamaş Pete sonuncu yoxlama oyunu və təlim-məşq toplanışı haqda fikirlərini bölüşüb:
“Göztəpə” ilə oyun yoxlama deyil, rəsmi matça bənzədi. Bizim üçün böyük sınaq oldu. Düşünürəm ki, ilk hissədə rəqibdən daha yaxşı oynadıq. Üçüncü qolu da vura bilərdik. Təəssüf ki, qarşısı alına bilən qollar buraxdıq. İkinci yarıda isə bərabərsəviyyəli oyun keçirdik. Rəqib heyətində və oyun tərzində dəyişiklik edərək daha yaxşı çıxış etdi. Ümumiyyətlə, təlim-məşq toplanışında istədiyimiz hər şeyə nail olduq. Çox şadam ki, həm ötənilki, həm də yeni futbolçular prinsiplərimi anlayır, fəlsəfəmi qəbul edir. Yola davam edəcəyik. Bundan sonra bütün diqqətimizi gələn həftə keçiriləcək Konfrans Liqası matçına yönəldəcəyik”.

Qeyd edək ki, bu gün dincələcək “Fehervar” şənbə günündən etibarən “Sumqayıt”la matça hazırlaşacaq. Oyun iyulun 25-də “Mehdi Hüseynzadə”də keçiriləcək.

KƏNAN BAHADIR