“Fehervar”ın hazırlığı və əsas qapıçısının durumu nə yerdədi? – düşərgədən fikirlər
“Sumqayıt”ın Konfrans Liqasının 2-ci təsnifat mərhələsindəki rəqibi “Fehervar” çempionatın və avrokubokların yeni mövsümünə hazırlığı davam etdirir.
Macarıstan təmsilçisi indiyə qədər keçirdiyi yoxlama oyunlarında yerlilərdən “Babolna”nı 9:0 “Ayka”nı 3:2 (oyun 120 dəqiqə davam edib – red.), Bolqarıstan “Hebar”ını 5:2 və Sloveniya “Dekani”sini 1:0 məğlub edib.
“Football-plus.az” xəbər verir ki, komanda sonuncu matçını Türkiyə “Göztəpə”sinə qarşı keçirəcək. “Fehervar”ın müdafiəçisi Nikola Serafimov bu ərəfədə hazırlıq prosesini dəyərləndirib və növbəti oyun haqda danışıb:
“Sabah bizi hazırlıq dövrünün son matçı gözləyir. Düşünürəm ki, son vaxtlar yaxşı iş gördük. Bunu davam etdirməliyik. “Göztəpə” hazırlıq dövrünün ən güclü rəqibidi. Baş məşqçinin bizdən tələb etdiklərini yerinə yetirmək məcburiyyətindəyik. Heyətimizə yeni qoşulan bütün futbolçulara güvənirik. Təəssüf ki, zədəlilər də var. Yenə də hər şeyin yaxşı olacağına inanırıq. “Fehervar”ın davamlı inkişafı üçün bütün gücümüzdən istifadə etməliyik”.
Komandanın qapıçılar üzrə məşqçisi Ferenc Hegedüs isə əsas qolkiper Balaş Totun durumuna toxunub. O, qapıçının milli üzvünə çevrilməsi üçün çalışdıqlarını bildirib:
“Hələ ki hər şey qaydasındadı. Totun ayağının gücü, dinamikası və sürətiylə bağlı problem yoxdu. O, yetərincə adekvat qapıçıdı. Hazırlıq matçlarında qolkiperin tez-tez topla təmin olunması üçün çalışırıq. Totu yaxşı tanıyıram. Məncə, həm çempionatda, həm də avrokuboklarda özünü yaxşı tərəfdən göstərəcək”.
Xatırladaq ki, “Sumqayıt” “Fehervar”la iyulun 25-i və 31-də qarşılaşacaq.
KƏNAN BAHADIR
Digər xəbərlər
