“Kəpəz” premyer-liqada ən asan sponsor tapacaq komandadı” – “İQ sports”un rəhbəri
Bir müddət öncə sabiq “Neftçi” rəsmisi Rüstəm Allahverdiyevin yeni yaratmış olduğu “İQ Sports” şirkətinin “Kəpəz”lə “Şamaxı”ya sponsor cəlb etmək istədiyini xəbər vermişdik.
Sözügedən şirkət artıq sosial şəbəkə hesabında Kəpəz dağı fonunda Gəncə təmsilçisinin yarandığı ili əks etdirən (1959) paylaşım edib. Paylaşımda bu sözlər qeyd olunub:
“Şirkətimiz vasitəsiylə yaxın günlərdə ilk sponsorluq müqaviləsinə imza atacağıq”.
Belə anlaşılır ki, söhbət “Kəpəz”dən gedir. Bəs klubun bu sponsorluq müqaviləsindən xəbəri varmı? Çünki bir neçə gün əvvəl “sarı-göylər”in mətbuat xidmətinin rəhbəri Azad Mustafayev redaksiyamıza verdiyi açıqlamada heç bir kənar sponsorun olmadığını və yalnız dövlətin ayıracağı maliyyə ilə növbəti mövsümə hazırlığı davam etdirdiklərini bildirmişdi.
Məsələni aydınlaşdırmaq üçün “İQ Sports”un rəhbəri Rüstəm Allahverdiyevlə danışdıq. Onun “Football-plus.az”a söylədikləri:
“Bəli, yeni sponsorla bağlı klubun məlumatı var. Yaxın günlərdə rəsmi imza mərasimi keçiriləcək. Söhbət hansısa fantastik sponsorluqdan getmir. Hazırda bu istiqamətdə hazırlıq çalışmalarımız davam edir və bir şirkət də “Kəpəz”ə sponsorluq etməkdə maraqlıdı. Dövlətin ayırdığı maliyyədən başqa gəlir yeri olmadığı üçün klubun özü də bu işdə maraqlıdı. Həmçinin nəzərə alsaq ki, ev oyunlarını başqa stadionlarda keçirdiklərinə görə xərcləri digər klublardan daha çoxdu. İndiki vəziyyətdə də “Kəpəz”ə sponsor cəlb etmək asan deyil. Çünki hazırda klubun heç nəyi yoxdu. Bu üzdən də indiki vaxtda hansısa şirkətin kluba dəstək göstərməsini sadəcə alqışlamaq lazımdı. Stadionun təmirindən sonra “Kəpəz” premyer-liqada ən asan sponsor tapacaq komandadı. İnşallah, çalışmalarımız öz bəhrəsini verəcək”.
KAMAL SƏFƏR
