"Oyuna xeyli sayıda azarkeşlə getməyi planlaşdırırıq. Hazırda qeydiyyatımız davam etdiyindən dəqiq say vermək üçün erkəndi. Üzvlərimizlə görüş sonrası "Zirə"ni avrokuboklarda dəstəkləmək qərarına gəldik. Keçmişdə "Sektor 11" olaraq, milli komandamızla yanaşı, avrokuboklarda iştirak edən bütün klublarımızı da stadiondan dəstəkləyirdik. Çünki nəticə olaraq bütün klublarımız Avropada ölkəmizi təmsil edirlər. Üzvlərimiz arasında hər klubun azarkeşləri mövcuddu, lakin mövzu Azərbaycan olduğu təqdirdə hamı bir yumruq kimi birləşərək klublarımıza stadiondan dəstək verməyə hazırıq. "Zirə" Bakının kiçik qəsəbəsini təmsil etdiyindən onların "Şerif"lə keçirəcəyi cavab matçında daha güclü dəstək görməsi üçün "Liv Bona Dea Arena"da olacağıq. Milli komandamızın azarkeş qrupu olduğumuzdan, xoreoqrafiya hazırlıqlarını öncədən federasiya və UEFA ilə razılaşdırırıq. Bu, xüsusi icazələr və vaxt tələb edən mürəkkəb işdi. Bu matçda xoreoqrafiya planlaşdırmamışıq, ancaq "Zirə"nin azarkeş qrupu "Qartallar"ın üzvlərindən tələb gəldiyi təqdirdə onların xoreoqrafiyasına məmnuniyyətlə kömək etməyə hazırıq. Həm stadionun şəhərdən uzaqda, dəniz kənarında yerləşməsi, həm də stadionun ətrafında iaşə obyektlərinin olmaması azarkeşlərin rahatlığı üçün arzuolunan deyil. Ancaq yenə də təmsilçimizi yalqız qoymayaraq sona qədər dəstək göstərəcəyik. Bütün futbol azarkeşlərini iyulun 18-də təmsilçimizə dəstək olmağa dəvət edirik".