“Ruslan Abışov da Berdıyevin köməkçilərindən biri olacaq” - “Turan Tovuz”un rəsmisi
Yeni mövsümə hazırlığın ilk mərhələsini Qəbələdə başa vuran “Turan Tovuz”un təlim-məşq toplanışının ikinci mərhələsi üçün Türkiyəyə yollandığını xəbər vermişdik.
“Sükan arxasına” Kurban Berdıyev kimi təcrübəli çalışdırıcını gətirən Tovuz təmsilçisi qarşıdakı mövsüm üçün iddialı olsa da, klubun transfer siyasəti bunu demir.
Görəsən, “bozqurd”un transfer çalışmaları yekunlaşıbmı?
Mövzuyla bağlı klubun idarə heyətinin sədr müavini Əli Balakişiyevlə danışdıq. Onun “Football-plus.az”a söylədikləri:
“Transfer çalışmalarımız davam edir. Hətta komandanın Türkiyədəki toplanışına bu gün və ya sabah bir transferimiz qoşulacaq. Ondan əlavə daha bir neçə oyunçunun düşərgəmizə qoşulacağı gözlənilir”.
Klub rəsmisi Ruslan Abışovun Berdıyevin məşqçilər korpusunda yer alacağı xəbərinə də aydınlıq gətirdi:
“Bəli, Abışov da Berdıyevin köməkçilərindən biri olacaq”.
Bilindiyi kimi, növbəti mövsüm “Kəpəz” də ev oyunlarını Tovuz şəhər stadionunda keçirəcək. Lakin ötən mövsüm rəhbərlik, sadəcə, bir meydança olduğundan əvəzedicilərin və akademiyanın məşqlərini keçirməkdə müəyyən çətinliklər yaşadığını bildirmişdi. Bunun da başlıca səbəbi projektorlardan birinin fəaliyyətindən yararlana bilməmək idi. Bəs projektor problemi həllini tapdımı? Əli bəyin cavabı belə oldu:
“Kəpəz” rəhbərliyi bu barədə bizə müraciət etdikdə biz də eyni regionu təmsil edirik deyə etiraz etmədik. Çünki bizə yaraşmazdı. Ehtiram Quliyev də ona ünvanlanan müraciəti təsdiqlədi. Növbəti ilin yanvarına kimi müqavilə imzalamışıq”
Klub rəsmisinin ot örtüyünün dəyişdirilməsiylə bağlı sualımıza cavabı isə belə oldu:
“Hazırda o istiqamətdə işlər gedir. Çox güman, mövsümün ortasında yaranacaq fasilə zamanı bunu edəcəyik. Bu üzdən də rayonlardan birinin stadionunu icarəyə götürməyi düşünürük”.
KAMAL SƏFƏR
Digər xəbərlər
