Okan Buruk: “Meydan “Beşiktaş”ın istəyinə uyğun seçilib”
İstanbul nəhəngləri üçün son yoxlama oyunları uğurlu alınmayıb.
Avstriyada toplanışda olan “Fənərbaxça” bu yayın 3-cü hazırlıq matçını keçirib. Daha öncə Rumıniya təmsilçisi “Petrolul”u 2:1 məğlub edən və Avstriyanın aşağı liqa təmsilçisi “Admira” ilə 1:1 bərabərə qalan “Fənər” bu dəfə daha ciddi rəqib - Xorvatiya təmsilçisi “Hayduk” ilə qarşılaşıb. Komanda qeyri-rəsmi oyunda da olsa, Joze Mourinyonun başçılığı altında ilk dəfə uduzub. Cennaro Qattuzonun çalışdırıdığı “Hayduk” 85-ci dəqiqədə vurduğu qolla minimal hesablı qələbə qazanıb. “Fənər” Avstriyada son oyununu bu gün “Strasbur”a qarşı keçirdikdən sonra vətənə qayıdacaq. Sloveniyada toplanışda olan “Beşiktaş” bu gün Zaqreb “Dinamo”su ilə qarşılaşacaq. Avstriyada toplanışda olan “Qalatasaray” isə srağagün bu yayın ilk yoxlama matçını keçirib. Türkiyənin son çempionu Avstriya təmsilçisi LASK ilə qarşılaşıb. Maraqlı və məhsuldar keçən oyunda “Cim-Bom” 2:3 uduzub. Komandanın hər iki qolunu Metehan Baltacı vurub. Gənc mərkəz müdafiəçisi ötən mövsümü “Eyupspor”da icarə əsasında keçirmişdi.
Bu arada LASK ilə oyundan sonra türkiyəli həmkarlarımıza açıqlamalar verən “Qalatasaray”ın baş məşqçisi Okan Buruk diqqətçəkən ifadələr işlədib. O, “Beşiktaş”a qarşı keçirəcəkləri superkubok matçının “Atatürk Olimpiya” stadionuna salınmasından narazılıq edib. Həmin oyun avqustun 3-də məhz bu arenada keçiriləcək:
“Bizim üçün faydalı oyun oldu. Bir çox gənc futbolçunu sınaqdan keçirdik. Oyundan məmnunam. Təmiz keçən bir qarşılaşma izlədik. Hər iki komanda yalnız futbol oynamağa köklənmişdi. Zaha fiziki cəhətdən tam hazır olmamasına rəğmən, çox istəkli idi. Bizim üçün önəmli futbolçudu. Ötən mövsüm bizə vacib matçlar qazandırdı. Limiti nəzərə alsaq, yeni mövsüm üçün legionerləri seçərkən çox çətinə düşəcəyik. Bəzi gənc oyunçularımızı yenidən icarəyə verəcəyik. Metehan bəyəndiyimiz futbolçudu. “Eyupspor”da çox yaxşı bir mövsüm keçirdi. İki qol vurması möcüzəyə bərabər bir şeydi. Superkubokun zamanı və məkanı bəlli oldumu? “Atatürk Olimpiya”ya salıblar? Allah səbr versin. Siz jurnalistlər orda meydanı görə bilirsizmi? O stadionda meydanda başverənləri görmək üçün durbin lazımdı. Ehtiyat skamyadan qalxıb meydana tərəf getmək və yenidən qayıtmaq üçün 1 dəqiqə vaxt gedir. Mən şəxsən oyunun orda keçirilməsini istəmirdim. Superkuboku “Atatürk Olimpiya”ya salmaq ən asan variantdı. “Beşiktaş” oranı istəyirdi. Federasiya onların istəyinə uyğun hərəkət edib. Ötən mövsüm VAR-a əcnəbi hakimlər gətiriləndən sonra söz-söhbət azaldı. Amma türk hakimlərinə güvənməkdə davam etməliyik. Fərq ondadı ki, eyni səhvi əcnəbilər etdikdə çox səs-küy salan olmur. Amma bizim hakimlər səhv edincə dərhal mövzu başqa yerlərə çəkilir. Fikrimcə, əcnəbi VAR hakimlərinin dəvət olunmasını davam etdirmək lazımdı”.
Digər xəbərlər
