İstanbul nəhəngləri yeni mövsümə hazrlığı davam etdirir.

Komandalar artıq yoxlama oyunları keçirməyə başlayıblar. Covanni van Bronkhorstun rəhbərliyi altında hazırlıq keçən “Beşiktaş” iyulun 6-da öz bazasındakı meydançada “Ümraniyəspor”la qarşılaşdı. Ən son 2022/23 mövsümündə superliqada çıxış edən 1-ci liqa təmsilçisi “Ümraniyəspor”u “Fənərbaxça”nın sabiq üzvləri idarə edir. Belə ki, komandanın baş məşqçisi Tuncay Şanlı, idarə heyətinin sədri isə Nikolya Anelkadı.

Yeni transferlərdən Qabriel Paulistanın start heyətində oynadığı matçda “Beşiktaş” rəqibinin müqavimətini qıra bilmədi və görüş qolsuz yekunlaşdı. “Qartal” sabah toplanış üçün Sloveniyanın Maribor şəhərinə yollanacaq. Komanda burda iyulun 13-də Zaqreb “Dinamo”su, 17-də “Şaxtyor”, 20-da isə QAK ilə qarşılaşacaq. “Fənərbaxça” isə iyulun 3-dən etibarən Avstriyanın Qrats şəhərində toplanışdadı. Daha öncə öz bazasında Rumıniya təmsilçisi “Petrolul”u məğlub edən Joze Mourinyonun komandası Avstriyada artıq ilk yoxlama matçını keçirib. “Fənər” iyulun 6-da “Admira” ilə qarşılaşıb. “Sarı-lacivərdlilər” Avstriyanın aşağı liqa təmsilçisi ilə bacara bilməyib və görüş 1:1 hesabı ilə yekunlaşıb. “Admira” artıq 7-ci dəqiqədə hesabı açsa da, buna 22-ci dəqiqədə penaltidən vurduğu qolla Ceko cavab verib. “Fənər” sabah “Hayduk”, iyulun 13-də isə “Strasbur”la qarşılaşdıqdan sonra vətənə qayıdacaq. İyulun 23-də isə komanda Çempionlar Liqasının 2-ci təsnifat mərhələsində “Luqano”ya qarşı ilk oyuna çıxacaq.

Yeri gəlmişkən, dünən bir futbolçunun “Fənərbaxça” ilə vidalaşacağı məlum olub. “Qalatasaray”a yollanan Mişi Batşuayini heyətdə saxlamağa ehtiyac görməyən “sarı-lacivərdlilər” bu dəfə Sərdar Əzizə başqa klubla danışıqlar aparmağa icazə verib. Yeni mövsüm üçün Mourinyonun planlarına daxil olmayan təcrübəli müdafiəçi dünən Avstriya toplanışını tərf edərək Türkiyəyə qayıdıb.

Qeyd edək ki, “Bursaspor”un yetirməsi olan və 2016-18-ci illərdə “Qalatasaray”da top qovan 33 yaşlı müdafiəçi 2019-un yanvarından “Fənər”də idi. Bu müddətdə o, 135 rəsmi oyuna çıxaraq 11 qol, 6 məhsuldar ötürmə ilə fərqlənmişdi. Sərdarın “Fənərbaxça” ilə 2025-ci ilə qədər müqavilə var idi. Türkiyə yığmasında 18 oyun keçirən və 2021-dən bəri yığmaya dəvət almayan Sərdarın karyerasını superliqa klublarının birində davam etdirəcəyi gözlənilir.