Bu qulaq nә qәdәr yalan yiyәcәk?
Verәn aldanacak, alan yiyәcәk.
Nә töksәn, onsuz da balan yiyәcәk,
Kimi aldadırsan, ay zalım oğlu?
(Məmməd İsmayıl)

Biri vardı, biri yoxdu, Ramil Şeydayev ad-soyadlı bir azərbaycanlı futbolçu var idi.

Azərbaycanda dünyaya gəlməsə də, bütün azərbaycanlılar onun gələcəyinə böyük ümidlər bəsləyirdi. Axı o, 1996-cı ilin bir mart günündə Sankt-Peterburqda doğulsa da, canı-qanı, kimliyi, davranışı, emosionallığı, bəzi hallarda isə hətta yöndəmsizliyi ilə özümüzkü idi, qanımız ona qaynayırdı, ən azı yığma səviyyəsində uğurlar qazanmağımıza yardım edə bilərdi. Kürdəmirli Teymur kişinin oğlunun başqa cür olması da mümkün deyildi. Hə, bu Ramil böyüdü, “Zenit”lə “Rubin”in heyətində özünü Rusiya publikasına göstərəndən sonr 20 yaşında Türkiyənin ən nəhəng klublarından birində - “Trabzonspor”da oynamaq imkanı qazandı, ardından “Jilina”, “Krılya Sovetov”, “Dinamo”, “Sabah” istiqaməti üzrə uzun yol qət edib, 2021-də “Qarabağ”ın düşərgəsinə - Qurban Qurbanovun sərəncamına döndü.

Bəli-bəli, məhz döndü, axı 2017/18 mövsümündə də qısa müddətdə ağdamlıların formasını geymişdi. Sadəcə, 2021-də verilən qərar artıq yetkin, dünyanın çox üzünü görmüş Şeydayevin qərarı idi.

…Yəqin ötən il mayın 28-də - “Azərsun Arena”da keçirilən mükafatlandırma mərasimində yaşanan mənzərə da yadınızdan çıxmayıb. Ramil Şeydayev Qurban Qurbanova sarılaraq göz yaşı axıdırdı. Müəllim tələbəyə, tələbə müəllimə minnətdarlıq edirdi. Əslində bu göz yaşlarında bir rəmzilik var idi. İki ay əvvəl 27 yaşını tamamlayan Ramil bəlkə də növbəti dəfə səhv seçim etdiyini, karyarasının çiçəklənən çağında heç kimin tanımadığı bir klubun – “Buriram Yunayted”in yolunu tutduğuna görə ağlayırdı. Karyera perspektivi, ən azı Avropa futbolunda ad çıxarmaq, iz qoymaq inadı asiyalıların puluna qurban verilmişdi. Daim Avropanın gözü önündə olan, qruplarda oynayan bir komandanı yalnız pula görə öz qitəsində belə sayılıb-seçilməyən Taylanda dəyişmək ağılsızlığın və məntiqsizliyin zirvəsi idi. Bundan sonra məntiqlə Ramilin karyerasında qürub yaşanmalıydı ki, elə yaşandı da. O, Taylandda, Buriram əyalətində xoşbəxt ola bilməyəcəyini çox tez anladı.

Bu hiss əsəblərini korladı, yaşıl meydanda elə bir davaya səbəbkar oldu ki, səs-sorağı Asiya Futbol Konfederasiyasının dəhlizlərinə yayıldı. Və cəmi 6 ay sonra Şeydayev ikiillik müqavilə bağladığı klubdan ayrıldı. Gözləmək olardı ki, Rami, heç olmasa, bu dəfə doğru qərar verəcək, potensialını tam açmağa, karyera yüksəlişinə nail olmağa imkan verən klub seçəcək. Amma yox, o artıq səhvlər zəncirində başını itirib. Həm də bəlkə növbəti dəfə pul gözünü tutub…

Şeydayev indi də “Buriram Yunayted”i “Kocaelispor”a dəyişir. Yəni elita təmsilçisindən gələn mövsüm superliqada oynayıb-oynamayacağı bilinməyən kluba, dünyada ən pis imicə malik üç-beş liqadan birinə keçir. Artıq iki-üç gündü Türkiyə və Azərbaycan mediasında Şeydayevin bu müqavilədən nə qədər qazanacağı müzakirə olunur. Yenə Ramilin futbolçu kimliyi, oyunu bir kənarda qalıb, pulu ön plana çıxıb. Bu artıq faciədi – həyatın, karyeranın önəmli anlarında, yolayrıclarında daim səhv qərarlar verən azərbayacanlı gəncin faciəsi.

Əlbəttə, pul əl çirki deyil, xüsusən də azərbaycanlı futbolçular üçün. Amma karyeranı pula qurban vermək, yolayrıcında qalanda gələcəyi yox, yalnız pulu düşünmək də yaxşı hal deyil. Daha dəqiqi, 27 yaşın içində olan futbolçu üçün yaxşı hal deyil. Ağlı başında olan istənilən futbolçu özünə yalnız ailəsinə pul qazanan adi varlıq, ailənin pul kisəsi kimi baxmamalıdı. Biz tam bir neçə il ərzində Ramil Şeydayevi Azərbaycanın futbol yığmasını keyfiyyətcə yeni səviyyədə qaldırmağa qadir olan bir şəxs, hətta bəlkə şəxsiyyət kimi gördük.

Yetişdiyi futbol mühiti, keçdiyi məktəb adamı ruhlandırırdı, Emin Mahmudovla yanaşı və ya onun ardından yığmanın heyətində yeni bir lider görəcəyimizlə bağlı ümidlər vardı, xəyallar, planlar qururduq. Heyf, min dəfə heyf! Ramil Şeydayev səhv seçimlərin və pulun cəlbedici parıltısının qurbanı oldu. Allah günahından keçsin!

P.S Yazı Ramil Şeydayevin "Kocaelispor"a keçidinin rəsmiləşmədiyi məqamda, lakin bu ehtimalın böyük olması ehtimalına əsasən qələmə alınıb.

HUŞƏNG