“Yuventus”da iki transfer əməliyyatı reallaşıb. İtaliya klubu bir yeni futbolçu alıb, bir oyunçusunu isə başqa kluba yollayıb.

“Fiorentina” Turin klubundan Moyze Keni transfer edib. Klubların mətbuat xidmətinin məlumatına görə, 24 yaşlı hücumçu ilə tibbi müayinədən keçdikdən sonra rəsmi müqavilə imzalanacaq. İtaliya mənbələri “Yuventus”un bu satışdan 13 milyon avro təzminat və 5 milyon avro bonus qazanacağını xəbər verib. Qeyd edək ki, Ken ötən mövsüm zədə üzündən “Yuventus”unyalnız 20 matçında iştirak edib.

Bu arada çoxdan gözlənilən transfer rəsmiləşib. “Yuventus” “Montsa”nın qapıçısı Mikele Di Qreqorionu transfer edib. Turin klubunun saytının məlumatında futbolçu ilə bağlanan müqavilənin detalları açıqlanmayıb. Tanınmış insayder Fabritsio Romano “Yuventus”un bu transfer üçün 2 milyonu bonus olmaqla təxminən 20 milyon avro ödəyəcəyini xəbər verib.

Xatırladaq ki, 26 yaşlı Mikele ötən mövsüm A seriyasının ən yaxşı qapıçısı seçilib. İtaliyalı futbolçunun mövsüm ərzində ən çox - 33 matçda 127 seyv etdiyini də bildirək.