Mikele Di Qreqorionun “Montsa”dan ayrılacağını xəbər vermişdik. O, gözlənildiyi kimi, karyerasını İtaliyanın ən titullu klubunda davam etdirəcək.

"Football-plus.az" xəbər verir ki, 26 yaşlı qapıçı artıq yeni klubunda təqdimata hazırdı. Tanınmış jurnalist Fabritsio Romano “Montsa”nın futbolçuya görə 18 milyon avro qazanacağını xəbər verib. Amma bu məbləğ kluba 2025-ci ildən başlayaraq mərhələli şəkildə ödəniləcək. Artıq Mikele də “Yuventus” ilə şəxsi müqaviləsinin şərtlərini razılaşdırıb.

Teun Koopmeyners ilə bağlı bir neçə həftə əvvəl yayılan xəbər də doğrulmaq üzrədi. “Atalanta”nın 26 yaşlı yarımmüdafiəçisi karyerasını “Yuventus”da davam etdirəcək. “Tuttosport” qəzetinin məlumatına görə, niderlandlı futbolçu Turin klubu ilə 5 illik müqavilə üzrə razılığa gəlib. Onun illik maaşının 4,5 milyon avro olacağı da bildirilib. Daha əvvəl Teunun “Liverpul”a keçə biləcəyi barədə də xəbərlər yayılmışdı. O, “Atalanta”da 2021-ci ilin avqustundan oynayır. Yarımmüdafiəçi son mövsümdə komandada bütün turnirlərdə 50 oyun keçirib, 15 qol vurub və 7 məhsuldar ötürmə edib. O, “Atalanta” ilə Avropa Liqasının qalibi olub. Koopmeynersin müqavilə ilə 2027-ci ilin yayına qədər bağlı olduğu klubu nə qədər irəli salacağı hələ ki məlum deyil.

Turin klubuna Duqlas Luis də qoşulacaq. Artıq onun transferi ilə də bağlı prinsipial razılıq əldə olunub. 26 yaşlı yarımmüdafiəçinin “Aston Villa”dan “Yuventus”a transferi üzrə danışıqlar son mərhələdədi. Duqlas İngiltərə klubunda 2019-cu ildən çıxış edir. O, son mövsüm bütün turnirlərdə 53 oyun keçirib, 10 qol vurub və 9 məhsuldar ötürmə verib.