“Yuventus”da bir sıra oyunçuların məsələsinə aydınıq gəlib. Turin klubunu iki futbolçu tərk edib.

"Football-plus.az" xəbər verir ki, Arkadiuş Milik çıxışını İtaliyada davam etdirəcək. “Yuventus” polşalı futbolçunu “Marsel”dən birdəfəlik transfer edib.

İtaliya klubu 29 yaşlı hücumçu üçün üç il ərzində 6,3 milyon avro təzminat ödəyəcək. “Marsel” müəyyən şərtlər daxilində bonus kimi daha 1,1 milyon avro irəli düşə bilər. Milik “Yuventus” ilə müddəti 2026-cı ilin yayına qədər nəzərdə tutulan müqavilə imzalayıb. Qeyd edək ki, o, ötən mövsüm icarə əsasında oynadığı komandada bütün turnirlərdə 39 oyun keçirib və 9 qol vurub.

Anxel Di Mariyanın “Yuventus” macərası isə bir il çəkib. Təcrübəli futbolçu artıq İtaliya klubunu tərk edib. Argentinalı yarımmüdafiəçi yenidən Portuqaliyada çıxış edəcək. O, artıq sabiq klubu “Benfika” ilə anlaşıb. “Record” qəzeti Di Mariyanın lissabonlularla birillik müddətə anlaşdığını xəbər verib.

Xatırladaq ki, 35 yaşlı dünya çempionu “Benfika”da 2007-10-cu illərdə çıxış edib. Sonra “Real” (2010-14), “Mançester Yunayted” (2014-15) və PSJ-nin (2015-22) formasını geyən Anxel “Yuventus”la ötən yay birillik müqavilə bağlamışdı.
Leandro Paredes də İtaliya klubunu tərk edib. 28 yaşlı yarımmüdafiəçi ilə icarə müqaviləsinin müddəti ayın sonunda başa çatacaq. Rəhbərlik onunla sözləşməni yeniləmək istəməyib. Nəticədə Paredes müqavilə ilə məxsus olduğu PSJ-yə qayıdıb.

Deyan Kulusevski növbəti mövsümə də “Tottenhem”də başlayacaq. İngiltərə klubu “Yuventus”dan icarəyə götürdüyü futbolçunun transfer hüququnu alıb. 23 yaşlı yarımmüdafiəçi ilə 5 illik müqavilə imzalanıb. “Tottenhem” bu transfer üçün Turin klubuna 30 milyon avro ödəyəcək.

İsveç millisinin üzvü londonluların heyətində 2022-ci ilin yanvarından oynayırdı. Deyan premyer-liqanın son mövsümündə 30 oyuna 2 qol vurub.