“Bavariya” çoxdan hədəfə aldığı oyunçunu sıralarına cəlb edib. Maykl Olise artıq Münhen klubundadı.

Almaniya klubunun rəsmi saytının yaydığı xəbərə görə, “Kristal Pelas”dan transfer edilən 22 yaşlı cinah yarımmüdafiəçisi ilə müddəti 2029-cu ilin yayına qədər nəzərdə tutulan müqavilə imzalanıb. Bir müddət əvvəl mediada “Bavariya”nın Olise üçün “Kristal Pelas”a 53 milyon avro təzminat və daha 5,9 milyon avro bonusu ödəyəcəyi xəbər verilmişdi. “Kicker” nəşrinin son məlumatında isə keçidin Almaniya nəhənginə ümumilikdə 70 milyon avroya başa gələcəyi qeyd edilib. Xatırladaq ki, fransalı futbolçu ötən mövsüm İngiltərə çempionatının 19 matçında iştirak edib, 10 qol vurub və 6 qolun ötürməsini verib.

Mayklın keçidi Joao Palyinyanın transferi ilə müşayiət olunacaq. “Bavariya” artıq onun da məsələsini həll edib. “Fulhem”in yarımmüdafiəçisi artıq yeni klubu üçün tibbi müayinədən keçib. “Bavariya”nın portualiyalı futbolçuya görə 47,5 milyon funt sterlinq ödəyəcəyi məlum olub. Palyinyanın yeni klubu ilə müddəti 2028-ci ilin yayına qədər nəzərdə tutulan müqavilə imzalayacağı da bildirilib. Joao son mövsümdə İngiltərə premyer-liqasında meydana çıxdığı 33 oyunda 4 qol vurub.