Almaniya polisi “Formula-1”in əfsanəvi pilotu Mihael Şumaherin ailəsinin şantaj edilməsi işi üzrə 4 şəxsi həbs edib.

“Bild” xəbər verir ki, həbs olunanlardan sonuncusu 55 yaşlı pilotun ailəsinin təhlükəsizlik xidmətinin sabiq əməkdaşıdı. Belə ki, o, Şumaherin yaxınlarının özəl fotolarının rəqəmsallaşdırılması ilə məşğul olaraq daha əvvəl həbs olunan üç şəxsə ötürüb. Həmin şəxslər ailədən 15 milyon avro tələb edib.

Xatırladaq ki, Şumaher 2013-cü ilin dekabrında Alp dağlarında xizək sürərkən yıxılaraq baş beynindən ciddi zədə alıb. Əfsanəvi pilot trassdan çıxmış, başı zərblə daşa çırpılmışdı. 2014-cü ildə onun üzərində üç əməliyyat aparılıb. Elə həmin ilin sentyabrında pilotun meneceri Sabine Kem bərpa prosesinin evdə davam edəcəyini bildirib. Pilotun yaxınları və ailə üzvləri onun sağlıq durumu haqda heç bir informasiya açıqlamır. Bu üzdən Şumaherin hansı vəziyyətdə olduğu bəlli deyil.