“Sumqayıt” həftəsonu daha bir oyunçusu - Masaka Murata ilə yolları ayırdı. Yaponiyalı futbolçu ilə uzunmüddətli danışıqlar müsbət nəticə vermədi.

Ötən ilin yanvarından “kimyaçılar”a qoşulan Murata 54 oyunda cəmi bir qol və 3 məhsuldar ötürməylə yadda qalsa da, klub onun xidmətində maraqlı idi. Nəhayət, toplanışa qoşulmayan əcnəbinin “qarınağrısının” səbəbi məlum oldu. Yarımmüdafiəçi karyerasının Danimarka “Veyle”sində davam etdirməyi məqsədəuyğun bilib. Masakiyə “Sumqayıt”da qalmağa mane olan səbəb nədi? 25 yaşlı əcnəbi “Futbol+”ə müsahibəsində həm sabiq komandası, həm də Azərbaycan ilə bağlı sualları cavabladı.

- “Sumqayıt”dan ayrılmağına səbəb nə oldu? Danışıqların uzun müddət davam etməsi nə ilə bağlı idi?
- Çox yaxşı mövsüm keçirdik. Bundan sonra futbolçunun yeni çağırışlar axtarması normaldı.

- Bəs “Sumqayıt”la bağlı fikirlərin necədi, Azərbaycandan hansı düşüncələrlə ayrılırsan?
- Biz bir ailə kimiyik. Hamı bir-birinə hörmət edir və komanda üçün çalışır. Bizi dəstəkləyən ən yaxşı azarkeşlərimiz var. Azərbaycan mənə doğma ölkədi. Həmişə də belə qalacaq.

- Samir Abasovdan incikliyin var? Çünki çempionat oyunlarının birində matçdan dərhal sonra səni meydanda danlaması sosial şəbəkələrdə yayıldı. Buna necə reaksiya verdin?
- Sadəcə, öz işini görürdü. Oyun zamanı o qədər həyəcanlıydım ki, onun nə dediyini dərhal anlaya bilmədim. Amma matçdan sonra mənə məntiqi izahat verdi. Samir Abasovla işlədiyim üçün çox fəxr edirəm.

- “Fehervar”la oyunda komandanın şansını necə görürsən? “Sumqayıt” Avropada mərhələ adlaya biləcəkmi?
- “Sumqayıt” həqiqətən yaxşı komandadı, böyük dəstəkçiləri var. Əlbəttə, asan olmayacaq. Amma əminəm ki, sabiq komandam qalib gələcək.

- Yeni komandan “Veyle” olacaq...
- Bəli, artıq Danimarkadayam. Bundan sonra yeni klubumun uğurları üçün çalışacam.

- Yenidən Azərbaycanda legioner həyatı yaşamaq istərsənmi?
- Çox danışa bilməyəcəm. Futbolçu üçün əvvəldən necə olacağını proqnoz vermək çətindi. Amma belə bir şans olsa, bəlkə də hə.

- Azərbaycan premyer-liqasının səviyyəsini necə görürsən? Burda nəyi bəyəndin, nəyi bəyənmədin?
- Liqanın səviyyəsi ildən-ilə yaxşılaşır. İkinci mövsümüm orada olduğum ilk altı aydan qat-qat yaxşı keçdi. Xüsusilə “Sumqayıt” üçün.

- Azərbaycan klublarından hansını daha peşəkar sayırsan?
- Bilmirəm... Bir kluba kənardan baxmaq orda işləməkdən çox fərqlidi. Bu üzdən fikir söyləyə bilmərəm.

- Yaponiyanı Azərbaycana dəyişmək sənə hansısa çətinliklər yaratdı?
- Dostlarınızın və ya ailənizin olmadığı bir ölkədə oynamaq asan deyil. Amma futbolçular, məşqçilər və heyət mənə çox kömək etdi. Buna görə də tez uyğunlaşa bildim. Başqa elə bir çətinliyim olmadı.

RÖYANƏ OĞUZ