Berdıyev ilə 850 min avro qazanacaq? - rəsmi açıqlama
Kurban Berdıyevi baş məşqçi postuna təyin etməklə “Turan Tovuz” rəhbərliyi növbəti mövsüm üçün daha ciddi yerlər uğrunda mübarizə aparacağını göstərdi.
Hazırda isə Tovuz təmsilçisinin Qəbələdə təlim-məşq toplanışı davam edir. Komanda ikihəftəlik məşqin ardından Türkiyənin Qızılcahamam bölgəsinə yola düşəcək. Bəs hazırki məşq prosesi nə yerdədi? Görəsən, yeni çalışdırıcı Kurban Berdıyev, köməkçiləri, eləcə də bütün futbolçular düşərgədədimi? Suallara cavab tapmaq üçün klubun idman direktoru Səməd Nəsibovla əlaqə saxladıq. Onun “Football-plus.az”a söylədikləri:
“Kurban müəllim başda olmaqla bütün məşqçi heyəti, eləcə də futbolçuların hamısı düşərgədədi. Təkcə Roderik Miller aramızda deyil. O da DÇ-2026-ya hazırlıq məqsədiylə Panama millisinə çağrıldığına görə. Hazırda təlim-məşq prosesi davam etdirilir”.
Yeri gəlmişkən, yayılan məlumatlara görə, türkmənistanlı mütəxəssis ilə 850 min avro, yəni 1 milyon 563 min 745 manat məvacib alacaq. Görəsən, bu xəbər nə dərəcədə reallığı əks etdirir? Klub rəsmisi isə bu məsələni belə şərh etdi:
“Mən də belə xəbərləri mediada görürəm. Qısaca onu deyə bilərəm ki, yalan məlumatdı, reallığı əks etdirmir”.
KAMAL SƏFƏR
Digər xəbərlər
