“Kəpəz”ə sponsor tapılmamasının əsas səbəblərindən biri də..." - Hüseynov belə izah etdi
Ölkə futbolunun köklü klublarından olan, dönəmində çempionluqlar, titullar sıralayan “Kəpəz” hazırda mövqeyini əldən verib.
Gəncə təmsilçisinin illərdi davam edən sponsor problem hələ də həllini tapmayıb. Bu səbəbdəndi ki, “sarı-göylər” yalnız AFFA-nın elita klublarına ayırdığı illik 3 milyon manat vəsaitlə hədəflərinə doğru irəliləyir. Başqa elita təmsilçiləri ilə müqayisədə büdcəsi az olan komanda məcburiyyətdən daha aşağı hədəflər uğrunda mübarizə aparır. Ancaq “Kəpəz” geridə qoyduğumuz mövsüm ərzində hər kəsi təəccübləndirərək, “Qəbələ” kimi akademiya və infrastruktur cəhətdən ölkənin 1 nömrəli klubunu mübarizədən kənarlaşdırmaqla elitada qalmağı bacardı. Hətta nə az, nə çox - 9 xallıq fərqlə. Görünən odu ki, minimum büdcə ilə maksimumu etdilər və qarşıya qoyulan elitada qalmaq tapşırığını layiqincə yerinə yetirdilər. Hədəfi yerinə yetirsələr də, büdcəyə əlavə maliyyənin daxil olmaması, yenə məhdudiyyətlər şəraitində fəaliyyət göstərmələri bəzi futbolçuların düşərgədən ayrılmasına gətirib çıxardı. İndi müqavilə müddəti bitmiş bir neçə oyunçuyla danışıq aparılır. Yəqin ki, yaxın günlərdə həmin futbolçuların da klubdakı gələcək taleyinə aydınlıq gələcək. Ölkənin ən böyük ikinci şəhərinin komandasına heç bir sponsor tapılmaması hər nə qədər üzücü olsa da, bir o qədər də maraq doğurur. Yəni tarixin ən qədim səhifələrindən gəlib çıxan Gəncə şəhərinin komandasına nə üçün heç kim yaxın durmaq, sponsorluq etmək istəmir? Axı ölkə futbolu tarixində bir sıra oyunçular, məşqçilər yetişdirən, böyük uğurlara imza atan, Kəpəz dağından ilhamlanan klubun belə vəziyyətdə olması heç də ürəkaçan deyil. Sponsor məsələsiylə bağlı çətinliklər haqda fikirlərini öyrənmək üçün gəncəli futbol adamı, millimizin veteran futbolçusu Yunis Hüseynovla danışdıq:
“Bilindiyi kimi, Gəncədə doğulub-böyüdüyümə və futbolda ilk addımlarımı burda atdığıma görə “Kəpəz” mənə doğmadı. Bu üzdən, əlbəttə, istəyərdim ki, “Kəpəz” də digər komandalar kimi avrokuboklara vəsiqə və ya çempionatda yüksək yerlər uğrunda mübarizə aparsın. Təəssüf ki, komandanın hədəfi yalnız premyer-liqada qalmaq olur. “Kəpəz”in sponsorsuzluğu mövzusuna gəlincə, doğrudu, hər klubun sponsoru var. Ancaq dövlət tərəfindən ayrılan 3 milyon manat da az pul deyil. Düzdü, həmin məbləğin 1 milyonu uşaq futboluna gedir, lakin fikrimcə, 2 milyon manat da az məbləğ deyil. Təbii, işin içində olmadığımdan dəqiq deyə bilmərəm ki, orda kluba və futbolçulara nə qədər vəsait xərclənir. Ancaq “Kəpəz”in heyətinə baxanda qiymətləri yüksək olan oyunçular yoxdu. Düşünürəm ki, həmin maliyyə əsasında da komanda saxlamaq mümkündü. Sözsüz, yüksək yerlər uğrunda mübarizə apardıqda məbləğ artır, istər-istəməz əlavə vəsait, yəni sponsor lazım olur. Hesab edirəm ki, Gəncə təmsilçisinə sponsor tapılmamasının əsas səbəblərindən biri də vaxtilə klub ətrafında söz-söhbətin həddən artıq çox olmasıdı. Bilindiyi kimi, iki ildi yerli media “Kəpəz” haqda danışır. Ona görə də sponsorların çəkindiyini və kluba yaxın durmaq istəmədiyini düşünürəm. Bu, mənim şəxsi fikrimdi. Mən həm də Futbolun İnkişaf Fondunun üzvüyəm, fondun icraçı direktoru Tural Piriyevlə əlimizdən gələni edir, çalışırıq ki, Gəncə təmsilçisinə sponsor tapaq. Bəzi sponsorlar var, Tural müəllim hələ də onlarla danışıq aparır. Ümid edirəm ki, inşallah, “Kəpəz”ə də sponsor tapılar”.
Yeri gəlmişkən, bir müddət öncə “sarı-göylər”in “F-Holdinq” şirkətiylə sponsorluq müqaviləsi imzalayacağı barədə xəbərlər tirajlanmaqdaydı. Uzun müddət davam edən danışıqların heç bir nəticəsi yoxdu. Deyilənə görə, “F-Holdinq” klubda yalnız öz sözünün keçəcəyi halda sponsorluq edəcəyini bildirdiyindən, “sarı-göylər”in rəhbərliyi bu şərtlə razılaşmayıb. Hər halda, bu mövzuda yenilik olub-olmadığını öyrənmək üçün FİF-in icraçı direktoru Tural Piriyevlə əlaqə saxladıq:
“Danışıqlar bitməyib, amma müsbət bir nəticə də hələlik yoxdu”.
“Kəpəz”lə bağlı daha bir maraqlı xəbər var. İddia olunur ki, gəncəlilər çətin günlərdən qurtulmağa yaxındı. Deyilənə görə SOCAR rəhbərliyi səviyyəsində kluba əlavə sponsorun cəlb olunması yönündə ciddi işlər görülməkdədi. Yəni SOCAR-ın tabeliyində olan şirkətlərdən biri “sarı-göylər”ə maliyyə dəstəyi göstərə bilər və yuxarı səviyyədə bununla bağlı göstəriliş verilib ki, ən qısa zamanda yeni sponsorun adı açıqlansın. Hətta bu ayın sonuna qədər “Kəpəz”ə pul ayıracaq şirkətin adına aydınlıq gələcəyi bildirilir. Buna səbəb kimi isə AFFA rəhbərliyinin stadionu 2025-ci ildə hazır olacaq klubun maliyyə dayağının yaxşı olmasını və komandanın 2025/26 mövsümündə də premyer-liqada iştirak etmək istədiyi deyilir. Əks təqdirdə əlavə vəsait ayrılmasa, elitada qalmaq hədəfinə çatmaq çətin olacaq. Dövlət başçısı İlham Əliyevin göstərişi ilə yenidən qurulan Gəncə şəhər stadionu isə boş qalacaq. Görəsən, bu xəbər nə dərəcədə reallığı əks etdirir? Çünki, bundan daha öncə klubun “F-Holdinq”lə anlaşdığı deyilsə də, Tural Piriyevin də dediyi kimi heç bir nəticə yoxdu. Gəncə təmsilçisinin premyer-liqada qalmasında önəmli pay sahiblərindən olan baş məşqçi Adil Şükürovun fikirləri:
“Bu barədə ancaq mətbuatda yazılır. Klubda bu barədə heç bir canlanma görünmür. Biz “Kəpəz” olaraq, hazırda AFFA-nın ayıracağı büdcəyə uyğun komanda qurmağa çalışırıq. “F-Holdinq” haqda da yazılar tirajlandı, amma nəticə göz qabağındadı. Nəyin necə olacağını gələcək göstərəcək”.
KAMAL SƏFƏR
