Davit Volkov, Kristian Sebalyos və Kristian da Silva ilə yollarını ayıran, Rauf Rüstəmlini "Şamaxı"ya icarəyə verən "Sabah" hələ ki transfer etməyib. Lakin o gün uzaqda olmaya bilər.

"Football-plus.az" xəbər verir ki, Masazır təmsilçisi heyətini millimizin və "Neftçi"nin yarımmüdafiəçisi Filip Ozobiçlə gücləndirmək niyyətindədi. Burda "bayquşlar"ın məşqçilər korpusuyla futbolçu arasında səmimi dostluq münasibətlərinin olmasının rolu böyükdü.

Əldə etdiyimiz məlumata görə, "Sabah"ın baş məşqçisi Krunoslav Renduliçin köməkçisi Saşa Sablyak transferin reallaşması məqsədilə Ozobiçlə əlaqə saxlayıb. Oyunçu "tələbələr”in formasını geyməkdə maraqlı olsa da, "Neftçi" ilə müqavilə müddətinin gələn ilin yayında bitəcəyi işi düyünə salır. Belədə "Sabah" "ağ-qaralar"a əlavə ödəniş etməlidi ki, rəhbərliyin bunun üçün xərc çəkib-çəkməyəcəyi bilinmir. Çünki "Neftçi" ötən il azad agent kimi heyətinə qatdığı futbolçunun satışından gəlir əldə etmək istəyir.

Xatırladaq ki, Ozobiç həm də “Spartak” (Rusiya), “Hayduk”, "Slaven" (hər ikisi Xorvatiya), “Qəbələ” və “Qarabağ” kimi klubların şərəfini qoruyub. 33 yaşlı oyunçu ötən mövsüm "ağ-qaralar"ın heyətində kubok və premyer-liqa çərçivəsində 33 dəfə meydana çıxıb, 8 qol, 7 məhsuldar ötürmə ilə yadda qalıb. O, 2021-ci ildən yığmamızın üzvüdü.

Yeri gəlmişkən, iki gün əvvəl "Neftçi"dən ayrılan Eddi İsrafilovun da "Sabah"la anlaşdığı iddia edilir.

KƏNAN BAHADIR