Hadisələrin məhz belə axarı ilə bağlı ilk xəbəri nüfuzlu insayder Ariel Helvani yayıb:
“Konor Makqreqorla Maykl Çendler arasındakı duel havadan asılı vəziyyətdədi. UFC B variantını işə salmağı düşünür. Bir həftə əvvəl haqqında danışdığım pozitiv atmosfer artıq yoxdu. Döyüş hələ ki ləğv olunmyıb. Ancaq belə bir ehtimal var ki, Çendler üçün başqa rəqib tapılsın. Ya da UFC 303 turnirinin əsas döyüşündə başqa idmançılar üz-üzə gəlsin”.
Dünən isə UFC prezidenti Dana Uayt sosial şəbəkə hesabında Makqreqor – Çendler döyüşünün ləğv edildiyini xəbər verdi. Bunun əsas səbəbi kimi irlandiyalının zədə üzündən oktaqona çıxmağa hazır olmaması göstərilir.
Məhz Çendler – Makqreqor döyüşü iyunun 30-da Las-Veqasda keçiriləcək UFC 303 turnirinin bəzəyi olmalıydı. Xatırladaq ki, Konor 2021-ci ilin iyulundan bəri ciddi ayaq zədəsi üzündən oktaqona çıxmır. Onun qarışıq döyüş növlərində çıxışının statistikası belədi: 22 qələbə, 6 məğlubiyyət. Çendlerin hesabında isə 23 qələbə və 8 məğlubiyyət var.
