Mbappenin təqdimat mərasimi nə üçün məhz bu tarixdə olacaq?

Məlum olduğu kimi bu yayın və son illərin ən böyük maraqla gözlənilən transferi artıq rəsmən açıqlanıb.

“Football-plus.az” xəbər verir ki, söhbət Kilian Mbappenin ''Real''a keçidindən gedir. Amma fransalı superulduz hələ ki, Madrid publikasına təqdim olunmayıb. Bu arada təqdimolunma mərasiminin tarixi müəyyənləşib. Mbappe iyulun 16-da, yəni AÇ-2024 başa çatdıqdan 2 gün sonra ''Real'' forması geyərək ilk dəfə ''Santyaqo Bernabeu''ya ayaq basacaq. Rəhbərliyin məhz bu tarixi seçməsi ilk növbədə Zinəddin Zidanla bağlıdı. AÇ-nin finalını xüsusi qonaq qismində izləmək niyyətində olan fransalı əfsanə 2 gün sonra İspaniya paytaxtına gələrək öz həmyerlisini fanatlara təqdim edəcək. ''Real'' rəhbərliyi klub tarixinin ən möhtəşəm mərasimini keçirməyə və Kriştiano Ronaldonun da təqdimatını kölgədə qoymağa hazırlaşır. Xatırladaq ki, 2009-cu ildə Kriştiano ''Mançester Yunayted''dən ''Real''a keçərkən ''Bernabeu''ya 80 minə yaxın azarkeş gəlmişdi. Həmin mərasimdə ''Real''ın əfsanəsi Alfredo Di Stefano, eləcə də Ronaldonun əfsanəvi həmyerlisi Eysebio da iştirak etmişdi.

ƏLİ