Ötən bazar günü başa çatan “Rolan Qarros”un yekunları haqda bilgi vermişdik.

"Football-plus.az" xəbər verir ki, “Real” kişilər arasında turnirin qalibi, ispaniyalı Karlos Alkarası təbrik edib: “Əziz Karlos, “Rolan Qarros”dakı ilk qələbən münasibəti ilə təbrik edirik. Madridista sənin “Böyük dəbilqə” turnirlərindəki üçüncü qələbənlə qürur duyur. Bizə möhtəşəm oyunundan ləzzət almaq xoşbəxtliyi nəsib etdin. Parlaq qələbədi! Təbrik edirik”.

Karyersında üç dəfə “Böyük dəbilqə” turnirlərinin finalında oynayan və hamısında qələbə qazanan Alkaras belə turnirlərdə qələbə sayına görə Novak Cokoviçlə rəqabət aparmaq şansı haqda danışıb. Xatırladaq ki, həm kişilər arasında rekordçu Cokoviç, həm də qadınlar arasındakı rekordçu Marqaret Kort hərəyə 24 “Böyük dəbilqə” qazanıb: “24 “Böyük dəbilqə” qazana biləcəyimə inanırammı? Bilmirəm, ancaq buna ümid edirəm. Finaldan əvvəl məşqçim Xuan Karlosla danışanda mənə dedi: “Sən üçüncü dəfə titul uğrunda mübarizə aparacaqsan, bunun necə çətin olduğunu bilirsən, Cokoviçdə isə belə titulların sayı 24-dü”. İndi bu haqda düşünə bilmərəm. Sadəcə, irəliləməyi davam etdirmək istəyirəm, baxaq görək karyeramın sonuna qədər neçə “Böyük dəbilqə” qazanacam. Ümid edirəm ki, 24-ə çatacam”.

Dünyanın sabiq bir nömrəli raketkası Mats Vilander isə Alkarasın finalda Aleksandr Zverev üzərindəki qələbəsini şərh edib: “Düzünü desəm, düşünürəm ki, Zverev bir qədər passiv idi, o, Karlosa öz oyun tərzini kortda diqtə etməyə imkan verdi. Biz artıq gözümümüzün önündə “Böyük dəbilqə” turnirlərinin üçqat qalibini görürük. O, növbəti Novak Cokoviç ola bilər. İndi Karlos Alkaras bizim idman növünə çox lazımdı. Ancaq dahi olmaq üçün qələbələrini davam etdirməlidi, bəlkə də hər il bir “Qızıl dəbilqə” qazanmalıdı. Bunu bacarsa, zirvədə qalacaq, bizim idman növünü çox dəyişəcək. Alkaras bir udum təmiz hava kimidi”.

Xatırladaq ki, “Rolan Qarros”un finalında Aleksanr Zverevi məğlub edən Alkaras həm də ATP reytinqində 2-ci pilləyə yüksəlib.