Parisdə keçirilən, 53 milyon 478 min avro mükafat fonduna malik “Rolan Qarros” turnirinə bazar günü yekun vurulub.

"Football-plus.az" xəbər verir ki, şənbə günü qadınlar arasında turnirin finalında İqa Sventeklə Yasmin Paolini qarşılaşıb. Polşalı Sventek faktiki heç bir müqavimətə rast gəlməyib – 6:2, 6:1. Onu da xatırladaq ki, Paolini karyerasında ilk dəfə “Böyük dəbilqə” turnirində final oynadı.

Hazırda qadın tennisinin 1 nömrəsi olan Sventek ardıcıl 3-cü, son 5 ildə isə 4-cü dəfə “Rolan Qarros”u qazandı. Polşalı ulduz 2022-ci ildə “US Open” turnirindən də qələbə ilə ayrılıb. Bir sözlə, “Böyük dəbilqə” turnirlərində 5 dəfə finala çıxıb və heç birində uduzmayıb. Karyerasında 5-ci dəfə belə turnirlərin qalibi olan 23 yaşlı polşalı bu göstəricidə Mariya Şarapova ilə Martina Hingisə çatdı. Karyerası boyunca 24 “Böyük dəbilqə”si olan Marqaret Kort qadın tennisində bu göstəricidə hamıdan öndədi.

Kişilər arasında turnirin finalı daha gərgin mübarizə şəraitində keçdi. Karlos Alkaras ilk setdə qalib gəlsə də, sonrakı iki setdən Aleksandr Zverev qalib ayrıldı. Ancaq sonradan sanki Almaniya təmsilçisini dəyişdilər. Yeri gəlmişkən, Argentina yığmasının dünyaca məşhur hücumçusu Lionel Messi finaldan əvvəl Alkarasa hədiyyə - imzalı formasını göndərmişdi. Formanın üzərində “Alkarasa sevgi ilə” sözü yazılmışdı.

21 yaşlı Alkaras karyerasında ilk dəfə “Rolan Qarros”un qalibi oldu. İspaniyalı ulduz buna qədər “US Open” (2022) və “Uimbldon” (2023) turnirlərində də hamıdam güclü olub. Ümumiyyətlə, o, karyerasında çıxdığı bütün “Böyük dəbilqə” finallarından qalib ayrılıb.

İyunun 9-da 21 yaş 35 günlük olan Alkaras 2007-ci ildən bəri “Rolan Qarros”da qalib gələn ən gənc tennisçidi. Həmin il turniri onun həmvətəni Rafael Nadal, özü də 21 yaş 7 günlüyündə qazanıb. Nadal onda turnirin həlledici oyununda isveçrəli Rocer Federeri məğlub etmişdi.

Zverev isə artıq bəxtindən şikayətlənə bilər. Almaniya təmsilçisi karyerasında 2-ci dəfə “Böyük dəbilqə”nin finalına çıxdı və yenə uduzdu. O, 2020-ci ildə “US Open”in finalında Dominik Timlə bacarmamışdı.

Reaksiyalar
İqa Sventek: “Yasmin, sənin Polşa dilində danışdığını bilirəm (Paolinin valideynlərindən biri polşalıdı – red.), ancaq indi ingiliscə deyəcəm ki, hamı anlasın. Möhtəşəm turnir münasibəti ilə səni təbrik edirəm. Bu iki həftə ərzində oyununla məni valeh etdin. Komandama və ailəmə də minnətdaram. Onlarsız mən burda olmazdım. Mənimlə bu qədər vaxt keçirməyiniz asan deyil. Bu turnirdə mübarizə aparmağı bəyənirəm. Hər il bura dönməkdən ötrü səbirsizlənirəm”.

Yasmin Paolini: “Final ağır keçdi. Ancaq finala qədər olan yol əla idi. Belə nəticəni ancaq arzulaya bilərdim. Azarkeşlərə, komandama və sponsorlarıma “sağ ol” deyirəm. Yenidən toparlanmaq və növbəti yarışlara hazırlaşmaq lazımdı. Həmişə irəli”.

Aleksandr Zverev: “İlk növvədə Karlosu təbrik edirəm. 21 yaşında üç dəfə “Böyük dəbilqə” turnirini qazanıb. Qeyri-adi nəticədi. Artıq möhtəşəm karyera qurubsan, adını Şöhrət zalına yazdırıbsam. Karlos qeyri-adi oyunçudu. Güman edirəm ki, bu turniri heç də sonuncu dəfə qazanmırsan”.

Karlos Alkaras: “Komandam son bir ay ərzində inanılmaz əziyyət çəkib. Zədəmi sağaltmaq üçün çox mübarizə apardıq. Madridə dönəndən sonra özümü heç də yaxşı hiss etmirdim, bura gəlib-gəlməməklə bağlı şübhələrimiz var idi. Yetərincə məşq etmədən Parisə gəldim. Belə komandam olduğuna görə Tanrıya minnətdaram. Bilirəm ki, komandam, ətrafımda olan adamlar ürəyini ortaya qoyur ki, tennisçi və şəxsiyyət kimi mükəmməl səviyyəyə çatım. Çox minnətdaram. Mən sizi komandam adlandırsam da, ailəmsiz”.

final
Kişilər
Alkaras (İspaniya, 3) - Zverev (Almaniya, 4) 6:3, 2:6, 5:7, 6:1, 6:2
Cütlərin yarışı
Arevalo/Paviç (Salvador/Xorvatiya, 9) – Bolelli/Vavassori (İtaliya, 11) 7:5, 6:3
Qadınlar
Sventek (Polşa, 1) - Paolini (İtaliya, 12) 6:2, 6:1
Cütlərin yarışı
Qauff/Sinyakova (ABŞ/Çexiya, 5) – Errani/Paolini (İtaliya, 11) 7:6 (7:3), 6:3