Alkaras Olimpiada “qızıl”ını “Rolan Qarros”da qələbədən üstün tutur
İspaniyalı tennisçi Karlos Alkaras Olimpiya Oyunlarında qızıl medal qazanmağın onun üçün “Rolan Qarros”da qələbədən daha üstün hədəf olduğunu bildirib:
“Olimpiya tituluna üstünlük verərdim, ona görə ki, ölkəmə medal gətirmək mənim arzumdu. Olimpiadanın “qızıl”ı ümumilikdə idmanda ən üstün hədəflərdən biridi. “Rolan Qarros” qazanacağıma görə çox şad ola biləcəyim turnirdi, ötənilki nəticələri yaxşılaşdıracağıma ümid edirəm. Ancaq hesab etmirəm ki, “Rolan Qarros”u qazanmamaq içimdə tikan olacaq”.
Fransa Açıq Çempionatı, yəni “Rolan Qarros” mayın 20-də başlayacaq, iyunun 9-da bitəcək. Parisdə keçiriləcək Olimpiya Oyunları isə 26 iyul – 11 avqust aralığında olacaq. 20 yaşlı Alkaras indiyə qədər “Böyük dəbilqə” seriyalı iki turnirdə (US Open-2022 və Uimbldon-2023) qələbə qazanıb.
