Stenli kuboku uğrunda 2-ci oyun da “Florida”nın qələbəsi ilə bitdi.

"Football-plus.az" xəbər verir ki, baxmayaraq ki, hesabı “Edmonton” açmışdı. “Neftçilər”in yeganə qolunda həlledici ötürməni Konnor Makdevid verdi. Kanadalı forvardın başa çatmaqda olan pley-off mərhələsində 27 məhsuldar ötürməsi var. O, bu göstəricidə karyerası boyunca üç dəfə (1985, 1987, 1988) 27 məhsuldar ötürmə verən Ueyn Qretskiyə, Mario Lemyeyə (1991) və Nikita Kuçerova (2020) çatdı. Amma Qretski bir dəfə 31, Lemye isə 28 məhsuldar ötürmə verməyi də bacarıb. Konnor həmçinin 32 (5+27) xalla cari Stenli kubokunda bombardirlər yarışına başçılıq edir.

Makdevid ardıcıl 2-ci məğlubiyyəti belə şərh edib: “Bunun çox çətin oyun olacağını anlayırdıq. Komandamızın toparlanacağı, nəyə qadir olduğunu göstərməyə başlayacağı anı səbirsizliklə gözləyirəm. Adamlar qoy hələ gücümüzə şübhə etsinlər”.

“Edmonton”un baş məşqçisi Kris Knoblaux da bu seriyada hələ heç nəyin həll olunmadığını düşünür: “Qələbəyə nail olmaq üçün yetərincə yaxşı oynadıq. Təəssüf ki, heç də həmişə qələbə qazanmaq olmur. Panika və sərt hərəkətlər üçün əsas görmürəm. “Edmonton” bir oyunda qalib gəlsə, - mən isə buna qadir olduğumuzu hiss edirəm – çox xoşbəxt olacağıq. İstəmirəm ki, komanda seriyada 0:2 geridə olmağımızın üzərində dayansın. Sadəcə, növbəti oyunda qalib gəlməliyik”.

Bu seriyada 3-cü oyunun iyunun 14-də Edmontonda keçiriləcəyini də xatırladaq.

Florida – Edmonton 4:1 (0:1, 1:0, 3:0)
Seriyada hesab – 2:0.