Borc bataqlığında üzən və FİFA tərəfindən müxtəlif cəzalar alan Türkiyə klublarının durumu müzakirə mövzusu olmaqdadı.

“Football-plus.az” xəbər verir ki, belə klublardan biri də “Antalyaspor”du. Sərgən Yalçınla yollarını ayıran və Aleks de Souza ilə ikiillik müqavilə imzalayan “ağ-qırmızılar”la bağlı yeni xəbərlər var. Öncə qeyd edək ki, Aleksin çox ağıllı tərpənərək müqaviləyə xüsusi maddə saldırdığı məlum olub. Klubun hazırda 5 futbolçu – Erkan Eyibil, Amar Gercaliu, Qustavo Leşuk, Fyodor Kudryaşov və Şerel Floranusa ümumilikdə 1,2 milyon avro borcu var. Bu borc ödənilməsə və FİFA qadağası aradan qaldırılmasa, Antalya təmsilçisi bu yay heyətinə yeni futbolçu cəlb edə bilməyəcək. Sən demə, Aleks bununla bağlı rəhbərliyin qarşısına şərt qoyub və onun şərti qəbul olunub. Belə ki, transfer cəzası götürülməsə və “Antalyaspor” yeni futbolçular ala bilməsə, Aleksin müqaviləni birtərəfli qaydada pozmaq hüququ olacaq!
Bundan başqa, antalyalılar Nuri Şahinlə olan problemi də indiyə qədər çözməyiblər. Nuri dekabrda Antalyadan ayrılaraq Dortmund “Borussiya”sının məşqçilər korpusuna daxil oldu. Həmin vaxt klubun ona 800 min avro borcu var idi və bu məbləğ hələ də ödənilməyib. Gənc mütəxəssisə daha bir pis xəbər vergi dairəsindən gəlib. Sən demə, “Antalyaspor” Şahinə görə yaranmış vergi borcunu da ödəyə bilməyib. Həmin borc əvvəlcə 400 min lirə idi. Amma klubla vergi darəsi arasındaki ödəmə anlaşması yerinə yetirilmədiyi üçün borc təxminən 4 dəfə artaraq 1,5 milyon lirəyə çevrilib. Üstəlik vergi dairəsi indi də həmin borcun Nuri Şahin tərəfindən ödənilməsini istəyir. Məsələdən yalnız vergi dairəsindən gələn xəbərdarlıqdan sonra xəbər tutan 35 yaşlı mütəxəssisə problemi yoluna qoymaq üçün 2 həftə vaxt verilib. Bu müddət ərzində qeyd olunan məbləğ ödənilməsə, Şahinin Türkiyədəki bəzi mülkləri müsadirə oluna bilər. Əslində Nuri Şahinlə “Antalyaspor” arasındakı müqavilədə verginin klub tərəfindən ödənilməli olması barədə maddə mövcud idi. Amma bu vəziyyətdə qaydalara görə ilk mərhələdə borcu Nuri Şahin özü ödəməlidi. Yalnız bundan sonra onun məsələni məhkəməyə daşımaq və dəymiş ziyanın qarşılanmasını tələb etmək haqqı yaranacaq.

Qeyd edək ki, “Antalyaspor”dan başqa hazırda “Kayserispor”, “Adana Dəmirspor”, “Konyaspor” kimi superliqa klublarında da transfer cəzası mövcuddu. Onlar da borclar üzündən FİFA-nın “qara sıyahı”sındadı.