“Barselona”da son bir neçə ildə daimi narahatlıq hökm sürür.

“Football-plus.az” xəbər verir ki, ancaq ən böyük bəlalardan birindən qurtulmaq mümkün oldu. 2023-cü ilin yazından bəri davam edən və kataloniyalıların ən sərt şəkildə cəzalanmasını, hətta aşağı dəstəyə göndərilməsini nəzərdə tutan korrupsiya ilə bağlı ittiham klubun üzərindən götürülüb.

“Neqreyra işi” nədi?
Bu qalmaqalın əsası 2023-cü ilin fevralında qoyuldu. Məhz onda İspaniya mediası xəbər yaydı ki, sən demə, “Barselona” uzun illər ərzində İspaniya Kral Futbol Federasiyasının texniki hakimlər komitəsinin vitse-prezidenti Xose Neqreyraya pul ödəyib. Klub 2001-18-ci illər aralığında onun hesabına 7,5 milyon avro köçürüb. Bu fakt özü-özlüyündə korrupsiya ilə bağlı şübhələnməyə əsas verir.

Artıq martda İspaniya prokurorluğu “Barselona”nı, Xose Neqreyranı və onun oğlunu, həmçinin kataloniyalıların iki sabiq prezidentini – Xosep Bartomeu ilə Sanrdo Rosseli üç maddə - korrupsiya, qeyri-düzgün idarəçilik, sənədlərin saxtalaşdırılması - məhkəməyə verəndə şübhələr bir qədər də gücləndi. İttihamların mahiyyəti bundan ibarət idi: “Barselona” Neqreyra hakimlər korpusunda çalışarkən həqiqətən də vasitəçi şirkətin əli ilə ona pul ödəyib, adı çəkilən məmur istefaya yollanan kimi ödənişi dayandırıb. Məhkəmə kataloniyalıların nə üçün pul ödədiyini aydınlaşdırmalıydı.

Klubdan dərhal bəyan etdilər ki, burda heç bir kriminal yoxdu – pul hakimlərin komandaya loyal münasibət göstərməsi üçün yox, hesabatlar və məsləhətlər üçün ödənilib. Məsələn, Neqreyra hesabatlarında kataloniyalı oyunçuların bu və ya başqa hakimə münasibətdə özünü necə aparmalı olduğunu, klubun hansı siyasət yürütməli olduğunu, qərarların səbəblərini yazıb. “Barselona” həmçinin bunun adi praktika olduğunu da bildirdi.
Təbii ki, belə təfsirlə heç də hamı razılaşmadı. Məsələn, La Liqanın prezidenti Xavyer Tebas belə dedi:

Bu vəziyyət Tebasla yanaşı, La Liqanın əksər klublarını qəzəbləndirdi. Təbii ki, “Real” başda olmaqla. Madridlilər ictimaiyyət önündə bu məsələni o qədər qabartmasalar da, kuluarlarda axıra qədər getməyin vacib olduğunu təbliğ edənlərdən idilər. İspaniya mediasının yazdığına inansaq, “Real” hətta Neqreyra ilə nə vaxtsa əməkdaşlıq etmiş bütün hakimlərin qovulmasını tələb edib. Ötən il sentyabrın 28-də bu işi aparan Barselona məhkəməsinin hakimi Xoakin Agirre Neqreyraya pul ödənilməsini cinayət saydı. İspaniya Kral Futbol Federasiyasının hakimlər komitəsində axtarış aparıldı. Oktyabrda isə əvvəlcədən adı şahid kimi keçən Xuan Laporta ittiham olunmağa başladı – onun idarəçiliyi dövründə Neqreyra Kataloniya klubundan bir milyon avroya yaxın pul alıb. Ancaq “göy-narıncılar” israrla bildirirdi ki, bu işdə cinayət tərkibi yoxdu – hakimlərə heç kim pul ödəməyib, korrupsiya ilə bağlı iddialar isə klubun imicini korlayır. Bu ittihamlar hətta qitə futbol qurumunun da diqqətini çəkdi.

İş bağlandı, ancaq təhlükə qalır
Bu ilin yanvarında hadisələrin axarı kəskin dəyişdi - əvvəllər “Barselona”nı rüşvət verməkdə suçlayan elə həmin Xoakin Agirre sübutlar çatışmadığına görə təhqiqatı bitirməyə qərar verdi. Məhkəmə məmuru hakimlərin satın alınması və ya danışılmış oyunlar ilə bağlı faktlar axtarsa da, heç nə tapmadı – bütün bank köçürmələri təmiz idi. Agirre bu işdə idman korripsiyasının olmadığını etiraf etsə də, vergi maxinasiyaları ilə bağlı şübhələrini qorudu.
Artıq mayda qapanmış iş fonunda şübhəlilər də bəraət qazanmağa başladı. Əvvəlcə “Barselona” təmizə çıxdı – məhkəmə kataloniyalıların rüşvət verməsi ilə bağlı ittihamı götürdü. “Blauqrana” bu qərardan razı qaldı. “Barselona”nın yaydığı rəsmi açıqlamada deyilirdi:

Mayın 31-də isə məlum oldu ki, ittiham olunanlar siyahısından Xuan Laporta və onun Direktorlar Şurası da çıxarılıb. Bir müddət əvvəl antikorrupsiya prokurorluğu kataloniyalıların indiki prezidenti ilə bağlı ittiham aktından şikayət vermişdi, ona görə ki, mümkün cinayətin müddəti bitib. Məhkəmə bu şikayəti təmin etdi. Maraqlıdı ki, Sandro Rossel və Xuan Bartomeu, həmçinin Xose Neqreyra özü də hələ ki şübhəlilər siyahısındadı. Hərçənd ilk iki şəxs də artıq apellyasiya ərizəsi yazıb, hakimlər komitəsinin sabiq rəsmisi isə bəyan edib ki, qocalara xas ağıl zəifləməsindən (onun 78 yaşı var) əziyyət çəkir və mühakimə oluna bilməz.

Düzdü, “Barselona”ya hələ vergi pozuntuları və sənədlərin saxtalaşdırılması üzrə ittiham irəli sürülə bilər, yəni bu qalmalallı tarixçə hələ başa çatmayıb. Ancaq indidən qalmaqalın necə nəticələnəcəyini güman etmək olar – hər şeydən belə görünür ki, “Barselona” sərt cəzadan canını qurtaracaq.