“Qarabağ”ın rusiyalı qapıçı Andrey Lunyovla yolları ayırması nə qədər gözlənilən idisə, bir o qədər də gözlənilməz oldu.

Qolkiperin klubla anlaşdığı zaman müqavilənin şərtlərinə görə ilk mövsümdə 200 min avro qazanması nəzərdə tutulurdu. Müqavilə müddətinin sonuna xeyli qalmış onun artıq klubdan 600 min avro istəməsi ilə bağlı xəbərlər dolaşırdı. “1+1” sistemi ilə imzalanan müqaviləyə srağagün xitam verildi. Daha da maraqlı məqam bu hadisənin “Qarabağ”la ulduzu heç cür barışmayan menecer Anton Smirnovun qapıçı ilə əməkdaşlığı dayandırmasından sonra baş verməsidi. Axı əksəriyyət Smirnovla vidalaşan Lunyovun ən azı daha bir mövsüm Ağdam təmsilçisinin heyətində çıxış edəcəyini düşünrüdü. Ancaq gözlənilənin əksi baş verdi. Tərəflər qarşılıqlı razılıq əsasında yolları ayırdı.

Lunyov yaxşı qapıçı idi, yoxsa pis?
Bizdə belə bir adət var: hər kəsin dəyərini o gedəndən sonra daha yaxşı anlayırıq. İndi də rusiyalı qapıçının ünvanına müxtəlif sözlər söylənilir. Yenə futbol ictimaiyyəti ikiyə bölünüb. Bəziləri Lunyovu ölkəyə gəlib-getmiş ən səviyyəli qapıçı adlandırır. Hətta belə səviyyəli futbolçuların ölkəyə nadir hallarda gəldiyini, qapıda isə etibarlı olduğunu dilə gətirir. Bəziləri də onun deyildiyi qədər güclü qolkiper olmadığını, ancaq sabit çıxış etdiyini bildirir. Hətta onu Şahruddin Məhəmmədəliyevlə müqayisə edənlər də var. Əslində hər bir tərəfin baxışında həqiqət var. Bəli, onun yaxşı qapıçı olduğu bəllidi. “Bayer-04” kimi məşhur klub adi bir qapıçını heyətinə cəlb etməzdi. Ümumi götürəndə ən azı orta səviyyəli bir qolkper üçün yetərincə etibarlı idi. Niyə yüksək yox, orta səviyyəli qapıçı? Bunu qolkiperin oyun zamanı buraxdığı qollarla əlaqələndirmək olar. Məsələn, Andrey uzaq məsafələrdən vurulan topların qarşısında aciz qalırdı. Bunu həm premyer-liqanın 22-ci turunda “Sabah”la oyunun 90+5-ci dəqiqəsində Tellur Mütəllimovun uzaq məsafədən heç də qeyri-adi olmayan zərbəsi zamanı, həm də Avropa Liqasının 1/16 finalının “Braqa”yla cavab görüşündə Alvaro Calonun 83-cü dəqiqədə vurduğu qolda görmək olur. Hər iki qolda top heç də dəf edilməyəcək qədər uzaq nöqtələrə uçmur. Bu üzdən iradlarda haqlılıq payı var. Bundan başqa, “Bayer-04”lə matçda son dəqiqələrdə buraxdığı qolu da qaytarmaq olardı. Lakin Lunyovun gəlişi ilə oyundaşlarına “çərçivə”də güvən verdiyini də unutmaq olmaz. Şahruddinə gəlincə, millimizin üzvü cəldlik, xətdə reaksiya baxımından Andreydən aşkar üstündü. Bunu baxımlı seyvlərdən də görmək mümkündü. Hətta qapıdan rəqibin cərimə meydançası həndəvərində nəzarətsiz qalan komanda yoldaşlarını görməsi də yaxşı xüsusiyyətlərindəndi. Ancaq təəssüf ki, Şahruddin qəfil kobud səhvləri ilə komandanı dəfələrlə çətin vəziyyətə salıb. Bu baxımdan Şah daha yaxşı qapıçı olsa da, yolverilməz səhvlər üzündən ona “çərçivə”ni əmanət etmək çox risklidi.

Nəticə
Hər iki qolkiperin oyun tərzi fərqlidi və müqayisə etsək, bir-birinə zidd olan xüsusiyyətləri var. “Qarabağ” kimi Avropada yüksək hədəflər uğrunda mübarizə aparan komandaya daha səviyyəli qapıçı lazımdı. Yəqin ki, məşqçilər korpusu bu istiqamətdə doğru təhlil aparacaq, ən düzgün qərarı verəcək. O ki qaldı Lunyovun komandadan ayrılmasına, burda böyük ölçüdə onun sabiq meneceri Smirnovun Rusiya mətbuatına verdiyi açıqlamaların da təsiri var. Smirnov menecerlik etdiyi futbolçu ilə komandası arasında balansı qoruya bilmədi. Belədə 32 yaşlı futbolçunun onsuz da başa çatan müqaviləsinin yenilənməməsi normaldı. İndi artıq Çempionlar Liqasında mübarizə aparacaq “köhlən atlar” daha etibarlı “əlcək sahibi” axtarır.

Fikir
Lunyovun “Qarabağ”dakı performansı, klubdan ayrılması, Şahruddinlə müqayisə olunması barədə Ağdam təmsilçisinin veteran qolkiperi Cəmaləddin Əliyevin də fikirlərini öyrəndik: