"Lunyov "Qarabağ"a yeni gələndə çox yaxşı çıxış edirdi. Həm avrokubok, həm də çempionat oyunlarında göstərdiyi oyunla rəğbət qazanmışdı. Ən əsası performansı sabit idi və uzunmüddətli işbirliyi üçün gələcək vəd edirdi. Lakin son vaxtlar meydanda həmin Lunyovu görmürük. Bir müddət keçəndən sonra hərəkətlərində arxayınlıq hiss olunmağa başladı. Çempionat matçlarında qarşısı rahatlıqla alına biləcək qollar buraxır. Xüsusilə qapıya gözlənilməz zərbələrə hazır deyil. Halbuki qapıçı daim ayıq-sayıq olmalıdı. Avrokuboklara gəlincə, ən diqqətçəkən məqam Avropa Liqasının 1/8 final mərhələsinin "Bayer-04" - "Qarabağ" (3:2) matçında oldu. Lunyov düzgün reflekslə üçüncü qolu buraxmaya bilərdi. Ümumiyyətlə, onun problemi budu. Bəzi epizodlarda donub qalır. Sanki nəyəsə arxayındı. Bu problemlərin öhdəsindən gəlsə, İbrahim Şehiç qədər olmasa da, klub tarixində iz qoya bilər".

"Qarabağ"ın çox güclü legioner qapıçıları olub. Bu sırada ən yaxşılar İbrahim Şehiçlə Asmir Beqoviçdi. Lunyovun da şansı var ki, ciddi uğurlar qazansın. Bunun üçün mövsümün əvvəlində olduğu halına dönməlidi. İndiki durum onun əleyhinədi. Klubun qapıçıyla yola davam edib-etməyəcəyini bilmirəm. Düşüncəm odu ki, müəyyən məsələlər müzakirə ediləcək və razılıq olsa, klubda qalacaq. Bununla yanaşı, həm Lunyov, həm də meneceri daha diqqətli olmalıdı. Çünki "Qarabağ" indiyə qədər heç kimdən asılı olmayıb. Rusiyalının əvəzinə başqasını tapmaq imkansız deyil. "Köhlən atlar"ın işi çətinləşir. Komandanı qarşıda Çempionlar Liqasının oyunları gözləyir. Həmçinin premyer-liqadakı rəqabət ildən-ilə artır. "Qarabağ" bu amilləri mütləq nəzərə alacaq. Məncə, hadisələrin axarı klubun Lunyovla yolları ayırmasıyla nəticələnəcək. Təbii ki, belə davam etsə... Yəni Lunyov performansına və davranışına düzən verməli, meneceri isə danışarkən daha diqqətli olmalıdı. "Qarabağ" əziyyətlə qazandığı imici söz-söhbət üzündən xərcləməz".