“Qarabağ”ın qapıçısı Andrey Lunyovun meneceri Anton Smirnovun Rusiya mətbuatına verdiyi müsahibədə Ağdam klubunu ən müxtəlif məsələlərə görə ittiham etməsindən xəbərdarsız.
Müsahibəylə tanış olanlar Smirnovun kəskin narazılığını və Lunyovu komandanın ən önəmli oyunçusu saydığını görə bilər. Ümumiyyətlə, menecer belə açıqlama verməkdə nə dərəcədə haqlıdı? Xüsusən də klubu daxildəki məlumatları mətbuata sızdırmaq kimi ittihamlarla çıxış etməsi düzgündümü?
“Football-plus.az” bu mövzunu menecer Erkin İbrahimovla aydınlaşdırıb.
“Doğrusu, Anton Smirnov adekvat adama oxşamır. Məsələn, neçə dəfə olub ki, Lunyov çempionatda ayaqları arasından top buraxıb, bu isə çıxıb tərifləyib. Sanki heç kim futboldan anlamır. Lunyovun həm uğurlu, həm də uğursuz oyunlarlı olub. Bəzən görürsən ki, menecer elə tərifləyir, hətta klubun işinə də girir. Başlayır ki, filan futbolçu zəif oynayıb və komandanı uduzdurub. Bəs sənin qapıçın “Qarabağ”ı uduzdurmayıb? Az olub? Dediyim ki, menecerin adekvat təsir bağışlamadığını düşünürəm. Çıxıb klubla olan danışıqları açıqlayır. “Qarabağ”ı qeyri-peşəkarlıqda ittiham edir, fəqət bir şeyi anlamır ki, klub məhz belə şeylərə görə şantaj olunmadığı üçün digər klublara örnəkdi. Elə yayda gördük ki, Emin Mahmudov “Neftçi”nin başına nə oyun açdı. Faktiki “Neftçi” indi verilən pula görə peşmandı. Ancaq “Qarabağ” belə oyunlara getmədiyi üçün buralara qədər gəlib çıxa bilib. Klubun özünü prinsipial göstərməsi xoşuma gəlir”.
KAMAL SƏFƏR