"Öncə rəqibi təbrik edirəm, qarşıdakı oyunda uğurlar arzulayıram. Çox gözəl kollektivləri var. Oyun əvvəldən sona qədər bizim üstünlüyümüz şəraitində keçsə də, bəxt amili sözünü dedi. Matç boyunca da bu hiss olunurdu ki, rəqib penaltilərə getmək istəyir. Buna səbəb isə qapçılarına olan güvən idi. Əlimizdən gələni etsək də, təəssüf ki imkanlarımızdan yararlana bilmədik. Bu matçı unudub 2-ci liqa uğrunda pley off mərhələsində "Şəfa" ilə oyunlara köklənməliyik. Futbolçularımla bununla bağlı söhbətim olub. Komandam mənim üçün çempiondu. Düşünürəm ki, məğlubiyyətə səbəb şanslardan istifadə edə bilməmək oldu. Sanki həmin gün bizim günümüz deyildi. Rəqibin qapçısı da çox yaxşı çıxış etdi. Onun oyununu qiymətləndirməmək olmaz. Bəxt "Şimal"ın üzünə güldü. İnşallah, UEFA Region Kubokunda ölkəmizi layiqincə təmsil edərlər. Biz əslində ilk hissədə oyunun taleyini həll etmək istəyirdik. Təssüf ki, rəqib futbolçu cərimə meydançamıza hava ötürməsi edərkən top qapımıza istiqamətləndi. Buna baxmayaraq, yenə də başımızı dik tuturuq. Yeni yaranmış komandayıq. Qarşıdakı oyunları düşünməliyik. Hər mübarizədən üzüağ çıxmağı bacaran ordumuz var. Biz həftədə 3, 4 dəfə məşq edirik. Hər məşqdə standart, eləcə də penalti zərbələri üzərində işləyirik. Lakin penalti lotereyadı. Dünyanın ən güclü komandasını belə penaltilərdə məğlub edə bilərsən. Düzdü, burda şans da rol oynayır. Bu məğlubiyyət özü bir təcrübədi. İnşallah, bundan böyük nəticə çıxaracağıq. 2-ci liqaya vəsiqə qazanacağımız təqdirdə tam fərqli "Hypers" görəcəksiz. Artıq bununla bağlı bu gün müəyyən danışığlarımız da olub".