Türkiyə yığmasının AÇ-2024 üçün açıqlanan heyəti ilə bağlı yeni xəbər var.

Bu dəfə daha iki gənc futbolçu – “Ayaks”ın üzvü Ahmetcan Kaplan ilə ötən mövsümü icarə əsasında “Trua”da keçirən, amma müqavilə ilə “Renn”ə məxsus olan qapıçı Doğan Alemdar heyətdən çıxarılıb. Onlar gənclər yığmasının düşərgəsinə göndəriliblər. Hər iki futbolçu dünən Şotlandiyanın U-21 yığmasına qarşı İstanbulda baş tutan hazırlıq oyununda iştirak edib. Amma Türkiyə Futbol Federasiyasından verilən açıqlamada qeyd olunub ki, futbolçular bu gün yenidən əsas yığmanın düşərgəsinə qoşulacaq. Hərçənd istənilən halda baş məşqçi Vinçentso Montellanın bu futbolçuları AÇ-2024-ə aparacağı gözlənilmir.

Daha öncə Çağlar Söyüncü ilə Bertuğ Yıldırım “ay-ulduzlular”ın heyətindən çıxarılmışdı. Çağlar zədəli olduğu üçün qarşıdakı turniri buraxmalı olacaq. “Renn”in üzvü olan 21 yaşlı Yıldırım isə U-21-in düşərgəsinə göndərilib. Yəni hazırda Montellanın açıqladığı 35 nəfərlik siyahıda oyunçuların sayı 33-ə enib. 26 nəfərlik yekun siyahı iyunun 7-də UEFA-ya göndəriləcək.