Türkiyə yığmasının AÇ-2024 üçün açıqlanan heyətində müəyyən dəyişikliklər baş verib.

“Football-plus.az” xəbər verir ki, bilindiyi kimi ''ay-ulduzlular''ın çalışdırıcısı Vinçentso Montella ötən cümə günü 35 nəfərlik geniş heyəti açıqlamışdı. İyunun 7-də isə 9 nəfərin adının ordan çıxarılacağı və 26 nəfərlik yekun siyahının UEFA-ya göndəriləcəyi gözlənilirdi. Amma artıq indidən həmin siyahıdan 2 futbolçu çıxarılıb. Bunlardan biri Çağlar Söyüncüdü. Artıq kifayət qədər təcrübəyə malik olan bu müdafiəçidən üzücü xəbər gəlib. Müqavilə ilə ''Atletiko''ya məxsus olan və ikinci dövrəni icarə əsasında ''Fənərbaxça''da keçirən 27 yaşlı futbolçu son turda ''İstanbulspor''la oyunda sağ ayağın arxa əzələsindən zədə alaraq 2-3 həftəliyə sıradan çıxıb. Düzdü, AÇ-nin başlamasına hələ 15 gün var. Buna baxmayaraq məşqçilər korpusu Çağları heyətdən çıxarmaq qərarına gəlib. Beləliklə, Çağlar Söyüncü qarşıdakı qitə turnirini buraxmalı olacaq. İkinci dəyişiklik isə Bertuğ Yıldırım ilə bağlıdı. Karyerasını ''Renn''də davam etdirən gənc forvard əsas yığmanın heyətindən gənclər yığmasının heyətinə keçirilib. O, iyunun 3-də Türkiyənin gənclər yığmasının Şotlandiyaya qarşı keçirəcəyi hazırlıq oyununda iştirak edəcək. Onu da bildirək ki, Türkiyənin əsas yığması ilə gənclər yığması 5-11 iyunda birlikdə hazırlıq keçəcəklər. Həmin dönəmdə bu komandaların iki dəfə hazırlıq xarakterli oyun keçirəcəyi gözlənilir.

ƏLİ