Avropada çıxış edən türkiyəli oyunçuların sırasına daha biri əlavə olunub. Söhbət “Hatayspor”un gənc forvardı Bertuğ Yıldırımdan gedir.

"Football-plus.az" xəbər verir ki, 21 yaşlı futbolçu Fransa təmsilçisi “Renn”ə transfer olunub. Liqa-1 klubundan verilən rəsmi məlumatda istedadlı oyunçu ilə beşillik müqavilə imzalandığı qeyd olunub.

Bertuğ rəsmi müqaviləyə imza atandan sonra bunları deyib: “Renn” kimi klubun gələcəklə bağlı layihəsində yer aldığım üçün xoşbəxtəm. Şəhər və klubun “altyapı”sı ilə bağlı ilk təəssüratım çox xoşdu. “Renn” ötən mövsümü əla keçirdi və ümid edirəm ki, yeni mövsümdə nəticələr daha da yaxşılaşacaq. Karyeramda yeni macəra başlayır və buna görə də çox həyəcanlıyam. Yeni komanda yoldaşlarımı tanımaq üçün səbirsizlənirəm. Doğan Ələmdarla bura gəlməmiş, təbii ki, söhbət etdim. Mənə şəhər və klub haqda gözəl şeylər söylədi. Rəqabətcil futbolçuyam və savaşmağı sevirəm. Liqa-1-də sürətli və fiziki futbol oynanıldığını bilirəm. Bu çempionatın səviyyəsinə uyğun futbolçu olduğumu sübut etmək istəyirəm. Həm bu məqam, həm də Avropa Liqasında oynamaq perspektivi “Renn”ə transferimdə mühüm rol oynadı”.

“Hatayspor”un baş məşqçisi Volkan Dəmirəlin “türkiyəli Holann” adlandırdığı Bertuğ “Sarıyer”in yetirməsidi. Peşəkar karyerasına bu klubda başlayan 186 sm boya malik forvard 2021-dən “Hatayspor”un şərəfini qoruyurdu. Ötən mövsümün 2-ci dövrəsini icarə əsasında “Antalyaspor”da keçirən Bertuğ indiyə qədər Hatay təsmilçisində 37 rəsmi oyunda 6 qol, 3 məhsuldar ötürməlik performans sərgiləyib. Hələ ki Türkiyənin əsas yığmasına dəvət almayan Yıldırım Türkiyənin U-21 yığmasında 2 oyuna 1 qol vurub. Onu da bildirək ki, türkiyəli qapıçı Doğan Ələmdar da “Renn”in şərəfini qoruyur. Ötən mövsümü Liqa-1-də 4-cü pillədə başa vuran Bruno Jenezionun kollektivi bu mövsüm AL-in qrup mərhələsində iştirak edəcək. 5 milyon avroluq satış “Hatayspor”un yeni rekordudu. Buna qədər rekord Aaron Bupendzaya məxsus idi. 2020/21-də hataylıların heyətində vurduğu 22 qolla superliqanın bombardırı olan qabonlu forvard 2021-in yayında 4,25 milyon avroya Qətər təmsilçisi “Əl-Ərəbi”yə satılmışdı.