Auperliqaya vəsiqə uğrunda pley-offun final oyunu baş tutdu və elitaya yüksələn sonuncu – 3-cü klubun adına aydınlıq gəldi.

“Football-plus.az” xəbər verir ki, “Yeni Adana Stadionu”ndakı qarşılaşmada “Sakaryaspor”la “Bodrum” üz-üzə gəldi. Xatırladaq ki, 1-ci liqada Arda Turanın çalışdırdığı “Eyupspor” mövsümü çempion kimi tamamladısa, “Göztəpə” 2-ci pilləni tutdu. Bu iki kollektiv birbaşa elitaya vəsiqə qazandı. “Sakaryaspor” 3-cü pilləni tutduğundan yeni qaydalara görə birbaşa pley-offun finalına yüksələrək rəqibini gözləməyə başladı. Mövsümü 4-cü pillədə tamamlayan “Bodrum” isə pley-offda əvvəlcə “Boluspor”u, sonra da penalti seriyasında “Çorum”u məğlub edərək finalda oynamaq haqqı qazandı. İlk dəqiqələrdən meydana yad əşyalar atıldığı üçün hakim bir müddət oyunu dayandırmalı oldu. İlk yarı bodrumluların böyük üstünlüyü ilə keçdi. 19-cu dəqiqədə “Antalyaspor”dakı çıxışı ilə tanınan Gökdəniz Bayrakdar sakaryalıların müdafiədəki kobud səhvini bağışlamadı. Fasiləyə qədər daha iki epizodda “Sakaryaspor”u tir xilas etdi. Fasilə ərəfəsində təcrübəli müdafiəçi Rayko Rotmanın “son ümid folu”na görə qırmızı vərəqə almasının ardından “Sakaryaspor”un vəziyyəti bir qədər də qəlizləşdi. Qələbəyə vaxtından tez inanan və ikinci yarıda fürsətləri sağa-sola xərcləyən “Bodrum” bunun acısını 72-ci dəqiqədə çəkdi. 25 yaşlı bolqarıstanlı forvard Zlatko Dimitrov bərabərlik qolunu vuraraq oyunu əlavə vaxta daşıdı. Amma “Sakaryaspor” rəqibin təzyiqinə tab gətirməyərək əlavə vaxtda “ağ bayraq qaldırmalı” oldu. 94-cü dəqiqədə Ondrjey Çelustka baş zərbəsi ilə “Bodrumu” önə keçirdi. Təcrübəli çexiyalı müdafiəçi Türkiyədə daha öncə “Trabzonspor” və “Antalyaspor”da top qovub. Çelustka hətta 2011/12-də ÇL-in qrupunda trabzonluların heyətində “İnter”lə səfər oyununda qələbə qolunu vurmaqla tarixə düşmüşdü. Oyunda son nöqtəni isə 103-cü dəqiqədə Tunahar Akpınar qoydu. Beləliklə, Ege bölgəsinin təmsilçisi olan və 1931-ci ildə yaradılan “Bodrum” tarixində ilk dəfə superliqaya vəsiqə qazandı. Bu klubda son illərdəki yüksəliş diqqəti çəkir. Bu kollektiv cəmi 9 il öncə - 2014/15-də həvəskarlar liqasında oynayırdı. “Bodrum” 2015-də 3-cü liqaya, 2017-də 2-ci liqaya və 2022-də 1-ci liqaya yüksəldi. Əslində bu komanda hələ ötən yay elitaya çıxmağa yaxın idi. Amma pley-offun finalında “Pendikspor”a boyun əymişdi. Maraqlıdı ki, ardıcıl 2-ci mövsümdə daha öncə elitada oynamamış bir klub superliqaya vəsiqə qazandı. Ötən yay “Pendikspor” da bu durumda idi. “Sakaryaspor”a gəlincə, sonuncu dəfə elitada 2006/07-də oynayan bu kollektiv 17 illik həsrətə son qoya bilmədi.