“Bəlkə də bu mövsüm Avropa Liqasının qalibi “Qarabağ” olacaqdı” - “Bayer-04” uduzdu, Azərbaycan çempionu yada düşdü
Avropa Liqasının çərşənbə günü keçirilən finalında “Atalanta” “Bayer-04”ü məğlub etməyi bacardı.
“Football-plus.az” xəbər verir ki, bununla da Almaniya klubunun 51 oyunluq məğlubiyyətsizlik seriyasına son qoyuldu, mif dağıldı. Xatırlayırsınızsa, “Qarabağ” 1/8 final mərhələsində məhz “Bayer-04” ilə dueldə məğlub olaaraq Avropadakı mübarizəsini dayandırmışdı. Baxmayarq ki, Qurban Qurbanovun yetirmələri hər iki matçda hesabda önə çıxmışdı. Hətta Leverkuzendə keçirilən cavab görüşündə Elvin Cəfərquliyevin yersiz qırmızı vərəqəsi üzündən ağdamlılar azlıqda mübarizə aparmışdı. Yeri gəlmişkən, Elvinin həmin “qırmızı”sı da ictimaiyyətdə fikir ayrılığı doğurdu. Bəziləri Entoni Teylorun doğru qərar verdiyini düşünsə də, bir sıra futbol adamları hakimin “sarı” ilə kifayətlənməli olduğunu bildirmişdi. Narazılardan biri də həmkarımız Kənan Məstəliyevdi. Belə ki, o, final oyunundan sonra da “Qarabağ”ın hakim səhvi üzündən mübarizədən kənarda qaldığını bildirib. Həmkarımız həm “Atalanta”nın, həm də “Qarabağ”ın aqressiv oyun sərgilədiyini, lakin hakimlərin italyanlara güzəştə getdiyini, amma bizə gələndə çox sərt qərar verdiklərini də əlavə edib. Bu haqda düşüncələrini ətraflı öyrənmək üçün Məstəliyevlə söhbətləşdik:
“Avropa Liqasının final matçı bir daha göstərdi ki, komandaların hamısına münasibət doğru olarsa, nəticələr də fərqli olar. Bütün ictimaiyyət “Bayer-04” – “Qarabağ” (3:2) görüşündə şahid oldu ki, Elvin Cəfərquliyevə haqsız yerə qırmızı vərəqə verildi. Hətta oyuna baxanda gördük ki, təcrübəli ingiltrəli hakim Entoni Teylor ilk növbədə sarı vərəqə verdi. Göründüyü qədər onu zorla VAR-a çağırdılar, Teylor da incələmədən sonra sarı vərəqəni qırmızı vərəqə ilə əvəzlədi. Doğrudu, azlıqda qalandan sonra daha bir qol vurduq. Amma yenə də bu vərəqə komandanın ümidini yarıbayarı kəsdi. Final görüşündə də gördük ki, “Atalanta” oyun tərzi, strategiyası baxımından “Qarabağ”la oxşardı. Məsələn, aqressiv futbol bu iki komandanın oxşar cəhətlərindən biridi. Ancaq “Qarabağ”dan fərqli İtaliya klubunun oyunçularının finalda daha kobud, sərt oynadığını, bəzi epiozdlara hakimlərin buna göz yumduğunu gördük. Bunu oyunun axarı kimi qəbul edirlər və komandaları çox da sıxmırdılar. Amma “Qarabağ”ın oyunlarında yarım epizodda belə çıxarıb vərəqə göstərmələri, xırda epizodlara çalınan fitlərlə hücumların qarşısını almaları açıq-aşkar görünürdü. Əminliklə deyə bilərəm ki, “Qarabağ”ı Azərbaycan təmsilçisi olduğuna görə hələ də hakimlər sıxır. Bunu nəinki bu mövsümdə, “Bayer-04”lə keçirilən görüşdə, əvvəıki mövsümlərdə də dəfələrlə görmüşük. Buna aid bir neçə fakt var və ard-arası kəsilmir. Hər dəfə belə etməklə təmsilçimizin qarşısını alırlar. Hesab edirəm ki, hakimliklə bağlı problem olmasaydı, “Qarabağ”, “Bayer-04” səddini keçəcəkdi və bəlkə də biz finalda “Atalanta” – “Bayer-04” yox, “Atalanta” – “Qarabağ” cütünü görəcəkdik. Doğrudu, dediklərim xəyal kimi görünə bilər, amma bəlkə də bu mövsüm Avropa Liqasının qalibi “Qarabağ” olacaqdı. Ola bilsin, finalda qalib gəlməyə və ya heç finala qədər gedib çıxa bilməzdik. Ancaq bir həqiqət var ki, “Qarabağ” artıq Avropa səviyyəsində futbol oynamağı bacarır, heç bir iddialı klubdan da geri qalmır. Bu üzdən də “Qarabağ”ın haqqı yeyildi. Bir sözlə, Azərbaycan təmsilçilərinin, xüsusən də “Qarabağ”ın uğurları Avropada çox qısqanclıqla qarşılanır və müxtəlif metodlarla bu uğurların qarşısını kəsməyə çalışırlar. Yenə də öz fikrimdə qalıram. Hakimlər Azərbaycan təmsilçilərinə münasibətdə qərəzlidi. Əminəm ki, qarşıdakı mövsümdə Avropada iştirak edən təmsilçilərimizə qarşı hakim səhvləri davam edəcək”.
KAMAL SƏFƏR
Digər xəbərlər
