"Qeyd etdiyiniz kimi, indiyə qədər iki qarşılaşmada "Şamaxı"nı tribunalardan dəstəkləmişik. "İmişli"yə qarşı matçda komandaya xəbər vermədən səfərə yollanmışdıq. Çünki çətin oyun olacaqdı. Düşündük ki, təmsilçimizi tək qoymayaq. Təəssüf ki, həmin oyunda şanslarımız çox olsa da, arzuladığımız nəticəni qazana bilmədik. "Qaradağ Lökbatan"la görüşdə iştirak etməyimizin səbəbi isə klubun səyləri oldu. Rəhbərlik komandanı dəstəkləyə bilməyimiz üçün bütün şəraiti yaratdı. Fanklub üçün 4 avtobus ayrıldı və yola düşdük. Bunda mətbuat xidmətinin rəhbəri Yusif Hüseynovun da payı var. Hadisələrin necə cərəyan edəcəyini bilmirik. Aradakı buzlar əridimi? Əmin deyilik. Matçın əvvəlində həyəcanlı, sonunda sevincli olduq. Bu barədə kimləsə danışmaq imkanımız olmadı. İndiyə qədər həm bizim, həm də klubun səhvləri olub. Amma hər şeyin istəyimiz kimi olmasını istəyirik. Yəni dəstəyə davam edib-etməyəcəyimiz klubun mövqeyindən asılıdı. Narazı qaldığımız məqamlar çoxdu. Bu barədə sözümüzü demişik. Ən önəmlisi premyer-liqaya yüksəlməkdi. Ümumiyyətlə, problemlər aradan qaldırılmasa, "Qaradağ Lökbatan" - "Şamaxı" oyunu komandanı dəstəklədiyimiz sonuncu matç olacaq. Əks halda növbəti mövsümdə yenidən tribunalarda olacağıq".