“Sektor 56” “Şamaxı” rəhbərliyinin avtobus ayırmaq təklifiylə razılaşmayıb
“Şamaxı” dünən Misli premyer-liqasının 3-cü turunda “Səbail”i qəbul etdi.
2-ci turda “Qəbələ”yə məğlub olan komanda ilk turda da “Neftçi” ilə oyunda xal qazana bilməmişdi. “Şirlər”in azarkeş qrupu “Sektor 56” srağagün komandanın qaldığı otelə gedərək futbolçularla görüşüb, “Səbail”lə oyundan öncə futbolçulara dəstək olub.
Bunu nəzərə alıb “Sektor 56” fanklubunun qurucusu Loğman Məlikli ilə əlaqə saxladıq. Onun futbolçularla görüşlə bağlı söylədikləri belə oldu: “Dünən azarkeş qrupumuzla birgə futbolçularımızın qaldığı otelə getdik. Bu da mənim təklifim idi. Hər oyundan sonra futbolçuları çağırırıq, onlar bizimlə görüşür. “Qəbələ” ilə oyundan sonra isə bu proses zamanı gördüm ki, futbolçuların əhval-ruhiyyəsi çox aşağıdı. Belə düşündüm ki, “Səbail”lə oyunöncəsi gedib onlara dəstək olmaq lazımdı. Bilsinlər ki, bizim üçün hesab önəmli deyil, əhvalınızı korlamayın. Beləcə otelə getdik. Onların bundan xəbəri yox idi. Həqiqətən çox sevindilər. Uşaqlardan da onları görmək istəyənlər var idi. Şəkil də çəkdirdilər. Həm futbolçularımız çox sevindi, həm də azarkeşlər”.
Məlikli fanklubun yaradılması haqda da danışdı: “Azarkeş qrupumuz 2019-cu ildə yaranıb. O zaman Şamaxının Region Liqasında çıxış edən komandası var idi. İstər ev, istərsə də səfər oyunlarında komandaya dəstək olurduq. Sonra müəyyən zaman kəsiyində fəaliyyətimizi dayandırdıq. Sonra şad xəbər aldıq ki, “Keşlə” “Şamaxı” olacaq. Biz də fəaliyyətimizi yenidən bərpa etdik. Hazırda fanklubun təxminən 200-ə yaxın üzvü var. Lakin bu elə bir məsələdi ki, dəqiq say deyə bilmərəm. Ev oyunlarımızda isə ortalama 80-100 nəfər olur. Yeni mövsümdə bir səfər matçına getmişik. Növbəti qarşılaşmalara da gedəcəyik. Səfər oyunlarına öz vəsaitimiz hesabına gedirik. Klubla aramızda bəzi problemlər var idi. Onlar buna son qoymaq üçün təklif etdilər ki, bundan sonra səfər oyunları üçün avtobusu biz ayıraq. Amma “çox sağ olun, biz azad fəaliyyət göstərəcəyik” dedik”.
ŞAİR ABDULLA
