Bu gün AFFA-nın İcraiyyə Komitəsinin iclası keçirilib.

"Football-plus.az" xəbər verir ki, tədbirdən sonra Qurban Qurbanov jurnalistlərin suallarını cavablandırıb. Mütəxəssis toplantıdakı müzakirələr barədə danışıb:

- İcraiyyə Komitəsində müzakirələr uzun çəkdi. İclasla bağlı təəssüratlarınız necədi?
- Maraqlı iclas oldu. Qərarlar az olsa da, gələcək, nələrə diqqət ayrılacağı ilə bağlı müzakirələr apardıq.

- Siz müzakirələrdə necə iştirak etdiz?
- Mənim elə də bir ciddi əlavəm olmadı. Hansı detallar var idi, onun ətrafında danışıldı. Buna fikirlərimizi bildirdik. Belə görüşlərin tez-tez keçirilməsi nəzərə alındı. Çünki birdən-birə bunların hamısını icra etmək asan deyil. Buna görə də bunları daha ətraflı müzakirə edib, Azərbaycan futbolunu inkişaf etdirmək, yaxşılaşdırmaqla bağlı detallara toxunduq. Ətraflı məlumatlar qarşıdakı görüşlərdən sonra daha çox olacaq.

- Klub sayının artırılmamasının əsas səbəbi nə idi?
- Bəzi klublarımız var ki, premyer-liqada iştirak etsələr də, problemləri var. Bu problem büdcə və strukturla bağlıdı. Regionlarda futbolun daha da inkişaf etdirilməsi nəzərə alındı. Hazırda buna tam hazır olunmadığı bildirildi. Gələcəkdə komanda sayının artırılmasına, Avropadakı bəzi ölkələrdəki saya uyğun olması ilə bağlı danışıqlar aparıldı.

- İllik xərclərlə bağlı hansı müzakirələr oldu?
- Məncə, o qarşıdakı görüşlərdə müzakirə olunacaq. Yəqin ki, bütün illik xərclər hesablandıqdan sonra bu, həyata keçəcək.

- Legioner limiti ilə bağlı nə dəyişiklik oldu?
- Hamı ortaq fikirdə oldu. 7+4-ün qalması çox da müzakirə olunmadı. Növbəti mövsüm üçün 8+3-ün olması barədə gedişata baxılacaq.

- İdman prinsipləri qorunacaq? Hansı klub premyer-liqaya yüksələcək?
- Böyük ehtimalla 1-ci pillədə olan komanda hazır olmalıdı. Lisenziya almağa hazırlaşmalıdı. Lazım olduğu halda da bu, veriləcək.