"Gündəlikdə bir məsələ var idi, o da Canni De Byazinin hesabatının dinlənilməsi və gələcək taleyi ilə bağlı müzakirənin aparılması idi. Məlumat üçün onu bildirim ki, Canni De Byazi iclasda iştirak etdi və qısa olaraq, nəticələr barəsində müəyyən məlumat verdi. Ondan sonra bildirdi ki, bundan sonra Azərbaycanda fəaliyyətini dayandırmalıdı və müqavilənin uzadılmamasını xahiş etdi. Canni De Byazi dinlənildi və AFFA İK üzvləri daxildə müzakirə apardılar. Son üç ildə onun vaxtında millinin nəticələri də nəzərə alındı. Ümumi məsələlər də müzakirə olundu və İcraiyyət Komitəsinin üzvləri tərəfindən də belə qənaətə gəlindi ki, müqavilənin uzadılmaması qəbul olunsun. Bu o deməkdi ki, Canni De Byazi ilə müqavilə uzadılmayacaq".

"Football-plus.az" xəbər verir ki, bu sözləri İcraiyyə Komitəsinin iclasından sonra AFFA-nın baş katibi Sərxan Hacıyev jurnalistlərə açıqlamasında deyib.

- Canni De Byazi özü bunu etməsə, İcraiyyə Komitəsi müqaviləni uzatmağı düşünürdü?
- Bu suala cavab vermək çətindi. Çünki bu bir az başqa istiqamətdə cərəyan edəcək hadisələr idi. Prossedur var və ilk növbədə baş məşqçinin hesabı dinlənilməlidi. Onun hesabatı dinlənildikdə, özü tərəfindən bu cür xahiş olundu. Xahiş olmasaydı, İK hansı qərarı verəcəkdi, mənim üçün demək çətindi.

- Hamı gözləyirdi ki, İcraiyyə Komitəsi italiyalı ilə bağlı qərar versin, amma görünür ki, De Byazi özü getməsini xahiş edib. İclasın da 10 dəqiqəsindən sonra AFFA-nın binasını tərk etdi...
- Öz fikrini bildirsə də, İK müəyyən müzakirələr apardı. Sonda İcraiyyət Komitəsi də nəticələri nəzərə alaraq, belə qərara gəldi ki, müqavilə uzadılmaması ən düzgünüdü.

- Başqa nələr müzakirələr edildi?
- Xüsusi işçi qrup yaradılacaq. Orada İcraiyyə Komitəsi tərəfindən də müəyyən üzvlər yer alacaq. Ehtimal var ki, kənardan da müəyyən mütəxəssislər cəlb olunsun və həmin işçi qrup tərəfindən baş məşqçi postuna müəyyən təkliflər verilsin. Əlbəttə ki, detallı şəkildə hər bir amillər nəzərə alınaraq, analiz olunacaq. Ondan sonra təkliflər İcraiyyə Komitəsində yenidən müzakirəyə çıxarılacaq və qərar veriləcək. İşçi qrupunun üzvləri ilə bağlı bu dəqiqə məlumat verə bilmirik. Yaxın zamanlarda məlumat veriləcək.

- Uzun illərdi ki, əcnəbilər millimizi çalışdırır. Yerli məşqçilər üzərində dayanmağın vaxtı çatması barədə iclasda müzakirələr aparıldı?
- İclasda müxtəlif fikirlər səsləndirildi. Bu barədə fikir mübadiləsi də aparılırdı. İcraiyyə Komitəsəsinin müxtəlif üzvləri tərəfindən müxtəlif fikirlər səsləndirildi. Siz dediyiniz fikrə də uyğun fikirlər səsləndirildi.

- Baş məşqçi məsələsinə nə vaxt aydınlıq gətiriləcək?
- Növbəti oyunumuz martdadı, o da yoldaşlıq oyunudu. Məqsədəuyğun odur ki, həmin yoldaşlıq matçlarından bir neçə ay öncə artıq baş məşqçi məsələsi həllini tapsın. Hələ ki, son tarix qoyulmayıb. Lakin düşünürəm ki, yaxın bir-iki ay ərzində məsələ öz həllini tapa bilər.

- Yanvarda İK-nin iclasına qədər qərar artıq hazır olacaq?
- Bu dəqiqə 100 faiz heç nə deyə bilmərəm. Amma ehtimal var ki, belə olsun. Çünki baş məşqçiyə də vaxt verilsin ki, martdakı oyunlara hazırlaşsın.

- Yeni baş məşqçi seçilərkən, hansı kriteriyalar əsas götürüləcək? Əsas məsələ ad olacaq?
- Xeyr, ad məsələsi əsas kriteriya kimi götürülməyəcək. Müzakirələr əsasında onu deyə bilərəm ki, vacib kriteriyalardan biri yerli mentaliteti və yerli futbolçuları tanıyan, daha çox yerli mədəniyyətə uyğun namizədin olmasıdı.

- O zaman belə çıxır ki, yerli mütəxəssislərin şansı daha yüksəkdi?
- Bu dəqiqə 100 faiz bunu demək çətindi. Amma millinin yeni baş məşqçisinin yerli olması ehtimalı az deyil.

- Canni De Byazinin mətbuatla bağlı dedikləri iclasda müzakirə edildi? Qınaq kimi ona nəsə deyildi?
- Bəli, bu məsələ də müzakirə olundu və qınanıldı. Belə halların olması İcraiyyə Komitəsi tərəfindən birmənalı şəkildə pislənildi.

- Canni De Byazi deyir ki, üç ildə yığma inkişaf etdi. Bəs, İcraiyyə Komitəsi bu haqda nə düşünür?
- Canni De Byazi dinlənildi və müzakirələr aparıldı. İcraiyyə Komitəsi onunla müqavilə uzadılmamasına qərar verəndə, təbii ki, nəticələri də nəzərə alınmışdı.

KƏNAN BAHADIR