Misli premyer-liqasının 31-ci turunda “Kəpəz” “Sabah”a 1:2 hesabıyla məğlub olub.

“Football-plus.az” xəbər verir ki, matçdan sonra qərblilərin baş məşqçisi Adil Şükürovun mətbuat konfransı keçirilib. Sizi mütəxəssisin fikirləri ilə tanış edirik:

- Qarşıdakı 5 oyunun hamısında məğlub olsaz, "Qəbələ" isə bütün matçlarda qalib gəlsə, premyer-liqanı tərk edəcəksiz. Sizcə, bu, mümkündü?
- Futbolda hər şey ola bilər. Biz kiminsə uduzmağını gözləməli deyilik. Əsas öz oyunumuzdu.

- Cavad Kərimov azarkeşlərə əl ilə jest etdi. Onunla söhbət edəcəksiz?
- Hər kəs istəklidi. Cavad gənc oyunçudu, stresli oyunlara hazır olmalıdı. Onunla danışıb tədbir görəcəyik.

- Qol epizodlarını dəyərləndirə bilməməyiniz nə ilə bağlıdı?
- Bu, futboldu. Alınmayanda alınmır. Futbolçuların heç birində məsuliyyətsizlikdən söhbət gedə bilməz. Onların hər birinə güvənirəm.

- "Kəpəz" sanki aqressiv oynamırdı. Bu, yorğunluqla bağlı ola bilər?
- Biz öz oyunumuzu oynamalı və xallarımızı qazanmalıyıq. Aqressivlik deyəndə, bilmirəm nəyi nəzərdə tutursuz. Deyə bilərəm ki, tam olaraq üstün futbol oynadıq. Təəssüf ki, şanslarda istifadə edə bilmədik.

- "Kəpəz"ə yeni mövsümdə yeni sponsor gələcəyi deyilir. Bu baş versə, avrokuboklar uğrunda oynayacaqsız?
- Gözləyək görək necə olacaq. Davamlı olaraq hədəf olmalıdı. Biz köklü klubuq. Komanda olaraq borcumuzdu ki, hədəfləri dəyişək. Sponsor məsələsi tam olaraq öz həllini tapandan sonra bu barədə daha ətraflı danışa bilərik. Futbolçuların əksəriyyətinin müqaviləsi bitir. Onlarla danışıq aparmalıyıq.