Aprelin 20-də İngiltərə kubokunda ilk finalçı müəyyənləşdi.

''Uembli''də ''Mançester Siti'' ''Çelsi'' ilə qarşılaşdı. London təmsilçisi bir sıra gözəl fürsətləri boşa verdi və son dəqiqələrdə futbolun yazılmamış qanunu işə düşdü. Bernardo Silva 84-cü dəqiqədə fərqlənməklə həm komandasını ardıcıl 2-ci dəfə kubokun finalına yüksəltdi, həm də ''Real'' ilə oyunun penaltilər seriyasında yol verdiyi səhvi az da olsa, unutdurmuş oldu. ''Siti'' bu nəticə ilə rəsmi matçlarda məğlubiyyətsiz seriyanı 29 oyuna yüksəltdi (23 qələbə, 6 heç-heçə). Bu, klub tarixinin yeni rekordudu. ''Real'' ilə qarşılaşmanın oyunsonrası penaltilər seriyasındakı məğlubiyyət bu göstəricidə nəzərə alınmır. Bura yalnız matçların 90 dəqiqəsində qeydə alınan nəticələr daxildi. ''Siti'' bu 29 qarşılaşmadan 17-ni premyer-liqada, 5-ni ÇL-də, 5-ni ölkə kubokunda və 2-ni Klublararası Dünya Çempionatında keçirib. Son məğlubiyyət dekabrın 7-də ''Aston Villa'' ilə səfər oyununda qeydə alınıb (0:1). ''Siti''nin bu göstəricidə əvvəlki rekordu (28 məğlubiyyətsiz oyun) Qvardiolanın 2-ci mövsümündə - 2017-nin aprel-dekabrında qeydə alınmışdı. ''Çelsi''yə gəlincə, bu komandanın cari mövsümü də tutulsuz başa vuracağı rəsmiləşdi. Roman Abramoviç dönəmi başa çatdıqdan bu yana London nəhənginin titulu yoxdu.

ƏLİ