Hər iki komandanın hədəfi avrokuboklara vəsiqə qazanmaqdı. Bu üzdən meydanda gərgin mübarizə gedəcəyini düşünmək olardı.

İlk dəqiqələr meydan sahiblərinin təzyiqiylə müşayiət olundu. “Turan Tovuz” fəal təsir bağışladı, hətta bir neçə epizodda rahatlıqla hesabı erkən açmaq mümkün idi. 3-cü dəqiqəsində Paçu uzaqdan zərbə vursa da, Cənnətov topu küncə çıxarmağı bacarır. 10-cu dəqiqədə Paçunun baş zərbəsi az qala qolla nəticələnəcəkdi. Nəhayət, “kimyaçılar”ın ifasında da təhlükəli vəziyyətə şahid olduq. 16-cı dəqiqədə Masaki Dossoya ötürmə verdi. Dossonun cərimə meydançasına ötürməsi zamanı Şəhriyar qapıların yerini səhv saldı - 0:1. 8 dəqiqə sonra gözlənilmədən fərq artdı. Rövlan qapıya zərbə vursa da, Alxasov topun tora düşməsinin qarşısını aldı. Sorqa isə qarşısına düşən topu tora göndərdi.

Artıq ilk yarıda bir baş məşqçi kimi fiasko ilə üzləşən Ayxan Abbasov start heyətini seçərkən ciddi səhvə yol verdiyini anladı. Ayxan Quseynovun meydana çıxmasıyla tovuzlular canlandı. Onların 2-ci hissədəki ilk tutarlı hücum cəhdi Əliyar Ağayevin “nöqtə”ni göstərməsiylə nəticələndi. Daha dəqiqi, Vüqar Serranonu cərimə meydançasının daxilində yerə yıxdı. Qonaqları Con cəzalandırdı. Qol ev sahibləri üçün ümid çırağı oldu. 59-cu dəqiqədə Serranonun irəliyə doğru baxımlı ötürməsini Otto qəbul etdi. Amma nigeriyalı hücumçu Cənnətovla dueldən məğlub ayrıldı. 88-ci dəqiqədə qonaqlar “Turan Tovuz”u əks-hücumda yaxaladı. Üç nəfərlə irəli atılan “kimyaçılar” Səbuhi Abdullazadənin zərbəsi hesabına fərqi artırır - 1:3. Matçın sonlarına yaxın qonaqların ifasında təhlükəli hücuma şahidlik etdik. Kehatın zərbəsi ev sahiblərinin oyunçusuna dəyib geri qayıtsa da, Rezabala fürsəti əldən vermədi və topu tora qovuşdurdu - 1:4. Beləliklə, “Turan Tovuz” sarsıdıcı zərbə aldı, “Sumqayıt” avrokuboklara vəsiqə şansını artırdı. 

Gözdən qaçmadı 
* Tovuzlu azarkeşlər oyundan öncə və sonra “Turan” buraya” şüarını səsləndirirdi. İlk hissə yekunlaşandan sonra azarkeşlər kütləvi şəkildə hakimə etirazını bildirdi.
* “Sumqayıt”ın 3-cü qolundan sonra azarkeşlər məyus halda stadionu tərk etməyə başladılar.
* Güclü külək üzündən stadionun projektorları silkələnirdi.

ƏSƏD SEYİDOV