“Bayquşlar”ın hədəfi avrokuboklar uğrunda mübarizədə iddiasını qorumaq üçün qələbə qazanmaqdısa, “köhlən atlar”ın itirəcəyi heç nə yox idi.

İlk dəqiqələr “Sabah”ın təzyiqiylə müşayiət olundu. Meydan sahiblərinin qazandığı cərimə zərbəsin Sekidika yerinə yetirdi. Nigeriyalının birbaşa qapıya zərbəsi dirəyin yaxınlığından keçdi. 7-ci dəqiqədə “Qarabağ” hesabı erkən açdı. Yankoviçin uzaqdan ötürməsini Veşoviç qarşılayıb irəli atıldı. Onun qapı önünə ötürməsini Benzya daha əlverişli mövqedə olan Andradeyə çatdırdı ki, sonuncu topu tora qovuşdurdu. Bundan sonra “Sabah”ın ruhdan düşəcəyini gözləmək olardı. Lakin “bayquşlar” tamaşaçıları təəccübləndirdi. Komanda mübarizəyə daha böyük istəklə davam etdi. Növbəti təhlükəli vəziyyəti Renduliçin futbolçuları yaratdı. Burda Benzya qapını nişan alan Parrisə imkan vermədi. “Sınmayan” meydan sahibləri 16-cı dəqiqədə istəyinə çatdı. Daha dəqiqi, Kahimin yerinə yetirdiyi künc zərbəsi zamanı qapıçı Ramazanov çıxışda səhvə yol verdi, onun adaşı Seydiyev topu sinəsi ilə qəbul etdi, yerə saldı və tora göndərdi. Bu anda müdafiəçilərin fikrinin harda qaldığını öyrənə bilmədik.

Qol “tələbələr” üçün ümid çırağı oldu. Əslində Juninyo rəqibin müqavimətini qıra bilərdi. Lakin 22-ci dəqiqədə onun qapıya zərbəsi İrasabala toxunaraq meydanı tərk etdi. Braziliyalı hücumçu daha sonra Zubirlə Andradenin qurduğu hücumu qeyri-dəqiq zərbəylə tamamladı, bir dəqiqə sonra isə Leandronun əla ötürməsindən yararlana bilmədi. 38-ci dəqiqədə meydanda maraqlı hadisə baş verdi. Zubir Seydiyevlə mübarizədə yerdə qaldı, hakim fit çalmadı, sürətli hücum zamanı Sekidika topu xeyli daşıdı, onu Belfodilə çatdırdı, təcrübəli futbolçu Juninyo ilə Bədavini ustalıqla arxada qoyub cərimə meydançasına ötürmə verdi. Sekidika asanlıqla hesabı komandasının xeyrinə dəyişdi. İkinci yarıda ilk hücum cəhdi 50-ci dəqiqədə “Qarabağ”dan gəldi. Zubir Benzyanın qapı önünə ötürməsini “9-luğ”a göndərsəydi, hadisələrin axarı dəyişə bilərdi. Amma bunun üçün dəqiqlik çatmadı. 56-cı dəqiqədə ağdamlılar daha bir zərbə aldı. Parrisin Elvini ustalıqla arxada qoyandan sonra ötürmə verdiyi Tellur başla topu tora qovuşdurdu. Burda diqqət ediləsi məqam epizodun əvvəlində yaşananlardı. Belə ki, Belfodil top uğrunda mübarizəyə qoşulan Bədaviyə dirsək zərbəsi endirmişdi. 65-ci dəqiqədə “Qarabağ” fərqi azaltmaq baxımından növbəti fürsəti əldən verdi. Belə ki, Andrade zərbə vurmağa geçikdi, Nicat irəli atılıb topa yiyələndi. “Köhlən atlar” 76-cı dəqiqədə ümidləndi. Benzyanın yerinə yetirdiyi künc zərbəsinin ardından Bəhlul başla topu komanda yoldaşlarına çatdırdı. Yenicə meydana çıxan Nərimanın zərbəsi dəqiq oldu. Lakin məğlubiyyətdən qaçmaq mümkün olmadı. Əksinə, 83-cü dəqiqədə Ramazanov Volkovun başla zərbəsini əla seyvlə zərərsizləşdirdi. Çox keçmədən Benzya uzaqdan zərbəylə bəxtini sınasa da, Nicatın müdaxiləsi uğurlu oldu. Beləliklə, “Sabah” “Qarabağ”ın premyer-liqadakı 18 oyunluq məğlubiyyətsizlik seriyasına son qoymaqla avrokuboklara vəsiqə şansını artırdı. Çempionun Masazırda uduzacağını, yəqin ki, çoxu gözləmirdi…

Gözdən qaçmadı
* “Qarabağ Ordu” tribunada yer almamışdı. “Soldati di Sabah” və “İmarət Tayfa” isə yerində idi. Bəzi azarkeşlər hakimin və futbolçuların üzərinə lazer şüası salırdı.
* Oyun bitəndən sonra meydana kənar şəxslər çıxdı.

KƏNAN BAHADIR